Mobil oyun bazarında daim yeni oyunlar ortaya çıxır. Lakin çox keçmədən bir çox oyunlar tədricən ölür və ya çox az oyunçu kütləsinə sahib olur. Nadir hallarda isə mobil oyunlar illərlə aktivliyini qoruyub saxlayır. Mobil oyun tərtibatçılarına layihələrini uğurla dərc etməyə kömək edən SuperScale bu bazarda işlərin həqiqətən necə işlədiyinə dair hesabat dərc edib. SuperScale tərəfindən dərc edilən araşdırma göstərir ki, əksər mobil oyunlar üç il ərzində “ölür”. Ümumiyyətlə hərkəs smartfonlar üçün oyun dərc etməyin varlanmaq üçün ən asan yol olduğunu düşünür. Lakin aparılan araşdırmalar bu fikri tamamilə təkzib edir.
Böyük Britaniya və ABŞ-da 500 oyun tərtibatçısı ilə aparılan müsahibələrə əsaslanan SuperScale hesabatına görə, inkişafda olan mobil oyunların 43%-i heç vaxt buraxılmır və buraxılan təxminən 85% mobil oyunlar ilk üç il ərzində “ölür”. Bundan əlavə, buraxılan oyunların 76%-i ilk ilində ən yüksək gəlirə çatır, yalnız 4%-i isə ikinci ilində bu dəyərə çatır. Tərtibatçıların yarıdan çoxu öz oyunlarını mütəmadi olaraq yeniləməyə və dəstəkləməyə çalışır, lakin 38% oyun tərtibatçısı müntəzəm olaraq yeniliklər etmir. Habelə oyunların sadəcə 5%-i 7 il və ya daha çox müddət yenilənmə alır. Təbii ki, bu oyunlar əsasən öz istifadəçi kütləsini daim sabit saxlayan oyunlardır.
Maraqlısı budur ki, iştirakçıların üçdə birindən çoxu mobil oyun sənayesindəki qeyri-müəyyənliyin onlara yeni layihələr hazırlamağa mane olduğunu desə də, 30% hissəsi bu gün uğur qazanmağın onsuz da çox çətin olduğuna inanır. Uğur qazanmağın çətin olduğuna inananlar isə məhdud resursları səbəb göstərir. Buna görə də oyun studiyalarının üçdə ikisi işçilərini ixtisar etmək və yaxud büdcələrini azaltmaq məcburiyyətində qalır.
