Azərbaycanın ilk vençur kapitalı fondu Caucasus Ventures yerli oyun studiyası olan Dynamic Box-a investisiya edib. Bununla da ötən ilin sonundan yaradılan fond portfolio startap sayını 10-a çatdırıb. Belə ki, fond daha əvvəl TestedWeb, Turan, Tripsome, Magic Port, Kikliko, JobEscape, Perkskit, Tass Vision və BERKM startaplarına dəstək olub. İndi isə qafqazın ilk vençur kapitalı oyun dünyasında perspektivli gələcək bəxş edən və 5 illik təcrübəyə sahib olan Dynamic Box studiyasına yatırım edib. Hələlik isə bu investisiyanın məbləği açıqlanmayıb.
Qeyd edək ki, Caucasus Ventures fondunun investisiya etdiyi Dynamic Box adlı yerli oyun studiyası 2017-ci ildən bazadadır. Habelə ölkəmizin adını qlobal layihələrdə təmsil edən bu startap 30 dan çox əməkdaş ilə, 70-dən çox layihə hazırlayıb. Macəra, RPG və Casual tiplərində müvafiq olaraq Relic Hunter, TERA və Neuro Bit oyunlarını hazırlayan studiya hazırda da 2 oyun üzərində işləyir. Məhz bu da göstərir ki, Azərbaycan çox yaxında oyun sahəsində də qlobal bazarda inkişaf edəcək. Caucasus Ventures fondunun investisiyası da məhz bu prosesi tezləşdirəcək.
Qeyd edək ki, studiya indiyə qədər 6-sı NFT, 20-si VR 10-u isə Mobile sahəsindən olmaqla ümumilikdə bir çox layihədə əməkdaşlıq edib. Təbii ki, vençur kapitalı fondu tərəfindən edilən investisiya studiyanın texniki tərəfdə yeniliklər etməsinə və daha çox layihələrin hazırlanması ilə beynəlxalq tədbirlərdə iştirak etməsinə kömək edəcək. Onu da qeyd edək ki, Caucasus Ventures-in kapitalı 11,3 milyon manatdır. Fonda Rəqəmsal İnkişaf və Nəqliyyat Nazirliyi 5 milyon manat, “PAŞA Holdinq” Şirkətlər Qrupu 5 milyon manat, fərdi sahibkarlar isə 1,3 milyon manat investisiya yatırıb. Fondun əsas məqsədi həm Azərbaycanda, həm də regionda startaplara investisiya qoymaqdır.
