Biraz futuristik səslənsə də, Tokiolu tədqiqatçılar Toyuqların qıqqıltısını tərcümə edə bilən süni intellekt hazırladıqlarını açıqlayıb. Belə ki, daha əvvəl də müxtəlif texnologiyaları hazırlayan Tokio universitetinin professoru Adrian David Cheok, indi rəhbərlik etdiyi komanda ilə birlikdə “toyuqların müxtəlif emosional vəziyyətlərini şərh edə bilən sistem” hazırlayıb. Daha fərqli desək, “Dərin Emosional Analiz Öyrənmə” adlanan ən son texnologiya aclıq, qorxu, qəzəb, məmnunluq, həyəcan və cansıxıcılıq kimi duyğuları süni intellekt texnikasından istifadə edərək tərcümə edir.
Maraqlısı budur ki, yeni hazırlanmış süni intellekt sistemi 6 fərqli emosional duyğunu tam 80% dəqiqliklə tərcümə edir. Bundan əlavə tədqiqatçılar bu sistemin “mürəkkəb riyazi alqoritmlərə əsaslandığını və hətta toyuqların daim dəyişən səs naxışlarına uyğunlaşmaq üçün istifadə oluna biləcəyini” deyir, yəni zaman keçdikcə sistem toyuqların qıqqıltısını daha tez və daha asan tərcümə edə biləcək. Tədqiqatçılar ilkin mərhələdə 80 toyuqdan alınan səs nümunələrini təhlil edib.
Bundan əlavə tədqiqatçılar 8 heyvan psixoloqu və baytar həkimi ilə də əməkdaşlıq edib. Onların fikrinə görə, yeni sistem toyuqların psixi vəziyyətlərini çox yüksək dəqiqliklə müəyyən edə bilir. Tədqiqatçılar bildirir ki, toyuqlar bəzən bədən dili və sosial əlaqələr vasitəsi ilə də ünsiyyət qura bilir. Yəni bilinənin əksinə onlar yalnız qıqqıltı ilə və ya başqa cür desək səs ilə ünsiyyətdə olmur. Hələlik sistem inkişaf mərhələsindədir. Çünki onun dəqiqliyi bəzən toyuqların cinsinə görə dəyişə bilir. Lakin çox yaxında texnologiya sahəsində daha bir futuristik süni intellekt sistemi bizlərə təqdim ediləcək.
