Ötən gün OpenAI şirkəti süni intellekt əsaslı yeni render modeli olan DALL-E 3-ü təqdim etmişdi. Belə ki, yenilənmiş render sistemi ilə mətnlər daha incə detallarla bəzədilmiş və yüksək dəqiqliklə hazırlanmış şəkillərə çevrilmişdi. İndi isə məlum olub ki, Microsoft yeni DALL-E 3 render modelinin öz Bing Chat çatbotuna əlavə edir. Görünən odur ki, Microsoft süni intellekt çatbotundan istifadə edənlərin sayını artırmağa çalışır. Artıq Bing Chat istifadəçiləri birbaşa olaraq DALL-E 3 render sistemində şəkillər hazırlaya biləcək.
Oktyabr ayından korperativ şirkətlər üçün istifadəyə veriləcək DALL-E 3 render modeli istifadəçilərə sadəcə bir neçə cümlə ilə xəyallarındakı mənzərəni və ya şəkli yaratmağa imkan verir. İndi isə Microsoft DALL-E 3 modelini Bing Chat çatbotuna əlavə etməklə əhatə dairəsini genişləndirir. Lakin hələlik bu xüsusiyyətin nə zaman çatbota əlavə ediləcəyi məlum deyil. Xatırladaq ki, Microsoft ötən günlərdə Bing-ə yeni alış-veriş funksiyaları da əlavə etmişdi. Ümumiyyətlə texnologiya nəhəngi Bing axtarış mühərrikinə son dövrlərdə süni intellekt əsaslı bir çox funksiya əlavə edib. Bu isə onun Google şirkətinin Chrome brauzeri ilə rəqabətə girməsinə imkan verir.
Bundan əlavə qeyd edək ki, yeni sistem əvvəlki versiya ilə müqayisədə inanılmaz dərəcədə təkmilləşib. Artıq render sistemi təsvirlər üzərində daha yüksək dəqiqliklə işləyə bilir. Həmçinin şirkət açıqlamasında bildirir ki, “DALL-E 3, təsvirlərin yaradılmasında DALL-E 2-dən qat-qat yaxşı işləyir. Məsələn, DALL-E 3 müəyyən obyektləri və onların əlaqələrini ehtiva edən səhnəni dəqiq şəkildə göstərə bilər”.
