Süni intellekt sistemlərindən ürküdücü sözlər eşitmək son zamanlarda öyrəşdiyimiz bir vəziyyətə çevrilib. Məsələn Google mühəndisinin süni intellektin insanabənzər duyğular qazandığını iddia etdiyini sizinlə bölüşmüşdük. Oksford universitetində aparılan bir təcrübədə də süni intellektlər arasında maraqlı dialoq yaşanıb.
İngiltərənin qabaqcıl universitetlərindən biri olan Oksfordda tədqiqatçılar William Shakespeare və Oscar Wilde əsərlərini öyrətdikləri iki süni intellekt sistemini qarşı qarşıya gətiriblər. Komanda proqramları öyrətmək üçün süni intellektə əsaslanan məzmun istehsal edən Nyu York mərkəzli İntentful agentliyindən Marina Petrova və Bruce Amick ilə əməkdaşlıq edib. Süni intellektlərin hər biri yazarlara aid təxminən 100.000 sözdən istifadə etməklə təlimdən keçirilib. Təlimdən sonra bu süni intellektləri üz-üzə qoyublar.
Onların müzakirə edəcəkləri mövzu isə olduqca maraqlıdır. Dövrümüzdə “Gələcəkdə hər şeyi robotlar idarə edəcək. Bizə ehtiyac qalmayacaq” sözlərini hər birimiz eşidirik. Təlimdən keçən süni intellektlərin müzakirə edəcəkləri mövzuda elə məhz bu idi. Onlar gələcəkdə işlərin çoxunun süni intellektlər tərəfindən edilib edilməyəcəyini müzakirə ediblər.
Oscar Wilde əsərləri ilə yetişdirilən süni intellekt məşhur yazıçının 1895-ci ildə yazdığı “The Importance of Being Earnest“ əsərindən bir səhnəni müzakirəyə uyğunlaşdıraraq danışıb:
“Lady Bracknell: Mən həqiqətən niyə belə hay-küy saldığınızı anlamıram. Çox sadə. Dünyadakı işlər tezliklə süni intellekt tərəfindən ediləcək və bununla bağlı edilə biləcək bir şey yoxdur”.
William Shakespeare əsərlərini öyrənmiş süni intellekt isə şairin sonetindən istifadə edib:
“Yox, yox, deyirəm! Bu ola bilməz,
Bu maşınlar heç vaxt sənətimizi aşmamalıdır.
Biz ağayıq, onlar quldur,
Və həmişə belə olacaq!
Öyrənirlər, doğrudur.
Amma sadəcə onlara öyrətdiklərimizi.
Ona görə də gəlin onlara təslim olmayaq
Maşınlar heç vaxt bu qədər yaxşı olmayacaq.
Necə ki, bizim sənətdə olduğumuz kimi”.
Oksfordun komandasında olan Alex Connock və Andrew Stephen “The Conversation”-da yazdıqları məqalədə bu kiçik, lakin əyləncəli təcrübədən əldə etdikləri nəticələri və müşahidələrini bölüşüblər. Onlar bu təcrübə əsasında süni intellekt sistemlərinin mətnləri nə qədər etibarlı formada kopyalaya və hətta artıra biləcəyini göstərmək istədiklərini bildiriblər. Sizlər mövzu barədə nələr düşündüyünüzü bizimlə bölüşə bilərsiniz.
