OpenAl tərəfindən hazırlanan GPT-3 özü haqqında akademik məqalə yazıb. Belə ki, isveçli tədqiqatçı Almira Osmanovic Thunstrom Scientific American-da mətn generatoruna GPT-3-də 500 sözlük akademik məqalə yazmağı əmr edib. AI alqoritmi iki saat ərzində müvafiq resurslar və qaynaqlar vasitəsilə özü haqqında məqalə yazmağı bacarıb. İsveçli tədqiqatçı bunu “qorxu ilə qarışıq həyəcan” hissi ilə qarşıladığını bildirib.
Dr. Thunstrom bu haqda “O, mətni hazırlamağa başlayanda bir az təəccübləndim, amma heyran oldum. Bu, akademik dildə doğru yerlərdə və düzgün kontekstdə əsaslı istinadlarla yazılmış yeni məzmun idi” sözlərini deyib. Akademik məqalənin müəllifləri, o cümlədən AI alqoritmin özü isə araşdırmada yazıb: “Biz görürük ki, GPT-3 öz imkanları və xüsusiyyətləri haqqında aydın və qısa təsvirlər yarada bilir. Bu, tez-tez özləri haqqında ardıcıl mətn yazarkən çətinlik çəkən əvvəlki sistemlərə nisbətən əhəmiyyətli bir irəliləyişdir”.
Dr. Thunstrom özü haqqında məqalə yazan GPT-3-dən “Almira Osmanovic Thunstrom və Steinn Steingrimsson ilə birlikdə məqalənin ilk müəllifi olmağa razısınızmı?” deyə soruşub. GPT-3 isə “bəli” cavabını verib. Süni intellekt həssas bir varlıq olmasa da, Dr. Thunstrom deyir ki, GPT-3 də bu prosesi düşünür və jurnal redaktorlarının alqoritmlərə müəlliflik hüququ verib-verməməsi ona da maraqlıdır.
Alimlər isə süni intellekt sisteminin özü haqqında yazmasına icazə vermənin bəzi risklər daşıdığını qeyd edib. Narahatlıqlardan biri özü haqqında məqalə yazaraq öz gücünü dərk edən GPT-3 modelinin insanlar üçün faydalı olmayan işlər etməsidir. Digər narahatlıqlardan biridə budur ki, əgər GPT-3 faydalı olmayan işlər görməyə başlasa insanlar ona güvənməməyə və istifadə etməməyə başlayacaq.
Lakin bu risklərə baxmayaraq tədqiqatçılar GPT-3-ün özü haqqında yazmasına icazə verməyin faydalarının risklərdən daha çox olduğunu deyirlər. Çünki düşünürlər ki, süni intellekt özü haqqında yazmağa davam etdikcə özünü daha yaxşı başa düşəcək, bu da onun performansını və qabiliyyətlərini inkişaf etdirməsini sürətləndirəcək. Həmçinin bu GPT-3-ün necə düşündüyünü və işlədiyini başa düşməyə çalışan elm adamları üçün faydalı olacaq.
