Alternativ enerji axtarışı davam edərkən alimlər uğurlu sınaqa imza atıblar. Belə ki, Kaliforniya texnologiya universiteti Caltech-in alimləri kosmosdan yerə ilk dəfə günəş enerjisi ötürə bilib. Qeyd edək ki, kosmosdakı günəş enerjisi paneli başqa adla SSPD-1 adlı prototip uğurla günəş şüalarını enerjiyə çevirərək yer planetindəki qəbulediciyə ötürə bilib. Ümumiyyətlə günəş enerjisi alternativ enerjilər arasında ən əhəmiyyətlisi hesab olunur. Lakin günəş enerjisinin də müəyyən mənfi tərəfləri var. Onlardan biri də gecələr və buludlu havalarda enerji toplaya bilməməsidir.
Alimlər günəş enerjisi panellərinin gecələr və buludlu havalarda enerji toplaya bilməsi üçün uzunmüddətdir araşdırma edir. Belə ki, onlar problemin həll yolunu kosmosda yerləşdirilən günəş panelində görüblər. Buna səbəb isə kosmosda günün istənilən vaxtı günəş şüalarının əlçatan olmasıdır. Xatırladaq ki, Yaponiya da 2025-ci ilə qədər kosmosdan yerə günəş enerjisi ötürməyi planlayırdı. Məhz bu onu göstərir ki, kosmosdan günəş enerjisinin əldə edilməsi yaxın gələcəkdə müxtəlif dünya ölkələri tərəfindən istifadə olunacaq. Planetimizdə artan enerji probleminin ətraf mühitə zərərsiz ən məntiqli həll yolu məhz günəş elektrik stansiyalarıdır.
Qeyd edək ki, kosmosda yerləşdirilən prototip günəş paneli mikrodalğalı siqnallar vasitəsi ilə xüsusi çiplərə enerji ötürə bilib. Bu isə yaxın gələcəkdə kosmosdan günəş enerjisi əldə edilməsinin mümkün ola biləcəyini göstərir. Mikrodalğalı sxemlərdən istifadə edildiyi üçün buludlar enerjinin ötürülməsində heç bir maneə törətmir. Alimlər yeni texnologiyanın uğurlu nəticəsindən sonra daha da təkmilləşdiriləcəyini bildirib.
