Xiaomi şirkəti axşama doğru keçirdiyi tədbirdə özünün yeni Xiaomi 13 Ultra modelini təqdim etdi. Əslinə qalsa smartfon olduqca güclü xüsusiyyətləri ilə diqqət çəkən bir smartfon kimi qarşımıza çıxır. Lakin yenə də bəzi şərh etməli olduğumuz detalları var. Çünki, şirkət nə qədər smartfonu innovativ xüsusiyyətləri nəzərə almaqla hazırlamış olsa da bəzi detallar kağız üzərində mükəmməl görünsə belə detallı araşdırılmalı imiş kimi təəssürat yaradır. Beləliklə, gəlin sizlərlə birlikdə Xiaomi 13 Ultra modelinə nəzər salaq.
İlk olaraq dizayn barədə detallara toxunsaq, cihazın gövdəsi düz kənarlı olsa da öndə qıvrımlı ekran işlətməyə davam ediləcək. Şirkət bunu, ekranı kənarlara doğru bükdükdən sonra 90 dərəcə bucaq altında kənarları davam etdirməklə əldə edəcək. Bənzər dizayn konsepti Xiaomi 13 Pro modelində də mövcuddur. Beləliklə, ilk diqqət çəkən nüans cihazın həm düz kənarlı, həm qıvrımlı ekrana birlikdə sahib olmasıdır.
Kənarlar düz bucaq altında getdikdən sonra isə arxa qapağın altına doğru qatlanıb yox olacaq. Arxa qapaq stili biraz fərqlidir. Cihazın arxasına “yapışdırılmış” bir örtük kimi vizuallıq yaradır. Xiaomi şirkəti smartfonu bir “fotoaparat” üslubunda dizayn etmək istədiyini bildirib. Hətta cihaz üçün əlavə bir qovluq hazırlanıb ki, smartfonu içərisinə qoyaraq böyük bir ehtimalla xarici LEICA obyektivlərini qovluğa bağlayıb cihazdan peşəkar məqsədlər üçün yararlanmaq olar. Yapışdırılmış hissiyatı verən örtük isə kamera modulunun qalınlığını gövdəyə yayaraq azaldır. smartfon yarıdan etibarən bir dəfə, kamera modulundan isə ikinci dəfə çıxıntı qazanır.
Yeni Xiaomi 13 Ultra modeli kamera performansı baxımından nə vəd edir?
Kamera demişkən, cihazı almağa səbəb yaradan ən başlıca üstünlük kamerası ola bilər. Xiaomi şirkəti xüsusilə kamera performansında necə lider ola bilərik sualının cavabını ən güclü texniki xüsusiyyətləri bir yerə toplamaqda tapıb. Cihaza 1 düymlük Sony IMX989 50MP kamera sensoru quraşdırılıb ki, əsas kameramız olan bu sensora düşən işıq miqdarı F/1.9 və F/4.0 arasında dəyişə bilən diafraqmaya malikdir. Fokus məsafəsi isə 23 mm-dir və uyğun olaraq sinematik görüntülərin çəkilməsində güclüdür. Eyni zamanda 8 elementli obyektivdən istifadə olunub.
Digər 3 fərqli kamera sensorumuz isə 1/2.51 düym ölçülü Sony IMX858 50MP sensorları ilə gücləndirilib. Uyğun olaraq bu kameralar Galaxy S23 Ultra modelindəki kimi 1 ədəd sadə telefoto, 1 ədəd periskopiik-telefoto və 1 ədəd ultra-geniş bucaqlı kameralardır. Onlardan birincisi 75 mm fokus məsafəsinə malik olub 3.2 qat optik yaxınlaşdırma vəd edərkən, F/3.0 obyektivli 120 mm fokus məsafəli ikinci kamera 5 qat optik yaxınlaşdırma edə bilər. Xatırladaq ki, təqdimatdan 240 mm fokus məsafəsi xatırlayırsınızsa, həmin rəqəm piksel birləşdirmə metodu ilə rəqəmsal olaraq əldə edilən dəyərdir. Obyektiv fiziki olaraq bu imkana malik deyildir. Eyni zamanda ultra-geniş bucaqlı kamera xaric olmaqla digər 3 kameramız OIS ilə gücləndirilib.
Kamera performansı həqiqətən çox möhtəşəm olmalıdır ki, cihazla 14 bitlik DNG formatında şəkillər çəkmək, LEICA tərəfindən təkmilləşdirilmiş filter və obyektivləri işlətmək smartfonu həqiqətən ən üst pillələrə daşıyır. Cihazın ani görüntüləri işləmə müddəti belə 0,8 saniyədir və bu rəqəm çox mükəmməl görünür. Summicron 1:1.8-3.0/12-120 ASPH obyektiv ilə sensorlara düşən işıqda əks olma və rəng kalibrasiyasının pozulması halları baş vermir. Son olaraq qeyd edək ki, cihaz 32MP selfi kamerasına malikdir və hələ də 1080P təsvir ölçüsündə 30FPS görüntülər qeydə alır.
Şərh etməli olduğumuz tərəfləri ilk olaraq burdan başlayır. Heyif ki, cihaz hələ də selfi kamerası ilə çəkilən videolarda heç bir təkmilləşdirmə gətirməyib. Bildiyimiz kimi, sensor ölçüsü 1 düymə nə qədər yaxındırsa, sensorun ölçüsü bir o qədər böyük olur. Bəlkə də daha güclü obyektivlərlə kamera performansında rəqabət apara biləcək olsa da ikinci dərəcəli kameralarda olan 1/2.51 düymlük Sony IMX858 sensoru, ən yaxın rəqibi OPPO Find X6 Pro modelindəki 1/1.56 düymlük Sony IMX890 ilə müqayisədə daha kiçikdir. Bu da detal zənginliyi və xüsusilə gecə çəkilişlərindəki performansa biraz mənfi təsir edə bilər. Kiçik bir detal isə diafraqmada diqqətimizi çəkir ki, Xiaomi şirkəti aktiv diafraqmaya keçid etdikdə 4 elementli yox, 2 elementli diafraqma işlədib. Bu detal isə aktiv diafraqmanın nə dərəcədə həssas işləyə biləcəyi ilə bağlı bəzi suallar yaradır. Nəticə etibarilə real testlərdən sonra nəticəni dəyərləndirmək və cihazın bacardıqlarını görmək mütləqdir.
Cihazın digər xüsusiyyətləri necədir?
Smartfon bu dəfə Samsung istehsalı ekran panelindən istifadə etmir. Huaxing C7 adlanan ekran paneli sektorun ən parlaq 2600 nitlik ekran paneli kimi çıxış edir ki, Xiaomi də bu cihazında bu ekran panelindən yararlanıb. 6.73 düymlük AMOLED ekran paneli 1440×3200p təsvir ölçüsünə malikdir. Görüntü yeniləmə tezliyi 120Hz olub, adaptiv görüntü yeniləməni də dəstəkləyir. 522ppi piksel sıxlığına malikdir və rəng kalibrasiyası şirkətə görə mükəmməl səviyyədədir. 1920Hz PWM qaraltma ilə gözə qarşı olduqca həssasdır. Ekran paneli Gorilla Glass Victus ilə qorunur.
Lakin ekran çərçivələri Xiaomi 13 Ultra üçün həddindən artıq qalındır. Sektorda Xiaomi 13 kimi mükəmməl ekrana malik cihaz təqdim edən şirkət üçün Xiaomi 13 Ultra modelinin ekran çərçivələri daha nazik ola bilərdi. Digər bir tərəfdən isə Çinli test edənlərin fikrincə ekran paneli gün işığı altında 2600 nit pik parlaqlığa çıxa bilsə belə, ümumi rəng dərinliyi baxımından daha yaxşı ola bilərdi. Uyğun olaraq Xiaomi 13 Ultra modelinin maksimum parlaqlıqda Galaxy S23 Ultra modeli ilə ekrandakı rəng fərqini və Oppo Find X6 Pro ilə müqayisədə çərçivə qalınlığını səhifə sonundakı qalareyada görə bilərsiniz.
Smartfon öz gücünü Snapdragon 8 Gen 2 çipsetindən alır. LPDDR5X və UFS 4.0 texnologiyalarına malikdir. Eyni zamanda USB 3.2 bağlantı texnologiyası ilə burda da ən güclü texniki imkanları əldə edib. Loo LiquidCool texnologiyası isə cihazdan maksimum dərəcədə termal və performans davamlılığı almağa imkan verir.
Cihaza 5000 mAs həcmli batareya quraşdırılıb və 90 vatt sürətli şarj dəstəkləyir. 11 dəqiqədə 50% şarj olan cihaz üçün bu dəyər daha da təkmilləşdirilə bilərdi. 50 vatt naqilsiz şarj isə tam şarja 49 dəqiqə tələb edir. Yaxşı detal var ki, naqilsiz şarj bəzi rəqiblərin naqilli deyə təklif etdiyi dəyərdən daha yaxşıdır. Son olaraq qeyd edək ki, smartfon IP68 sertifikatına malikdir. Xiaomi 13 Ultra mdoelinin tamamilə yeni xüsusiyyəti isə uzun gözləmə rejimidir. Bu yolla siz 1% enerji ilə 12 dəqiqə danışıq və ya 1 saat işləmə müddəti əldə edə bilərsiniz. Surge G1 və P2 çipləri burada batareyaya nəzarət etməkdədir. Stereo səs ucaldanlar Dolby Atmos dəstəyinə malikdir.
Xiaomi 13 Ultra əlçatanlığı və qiyməti
Qarşıdakı aylarda qlobal bazara da gələcək Xiaomi 13 Ultra modelinin çindəki başlanğıc qiyməti 12-256GB yaddaşa sahib variantı üçün 5999 Yuan (870$) təşkil edərkən, 16-1TB yaddaşa malik variantı 7299 Yuan (1060$) ətrafındadır.
