Alimlər yanıqlar zamanı itmiş toxunma hissini bərpa edə bilən yeni elektron dəri texnologiyası hazırlayıb. Ümumiyyətlə dəri sinir sisteminin xarici dünyanı qavraması üçün əhəmiyyətli vasitədir. Həmçinin dəri insan orqanlarını qoruyur. Lakin bəzən dəri səthində ortaya çıxan yanıqlar və digər amillər toxunma hissinin itməsinə səbəb olur. Stanford Universitetinin bir qrup alimi bu hissi bərpa etmək üçün yeni texnologiya hazırlayıb. Beləliklə yeni texnologiya vasitəsi ilə toxunma hissini itirən insanlar artıq toxunma hissini yenidən bərpa edə bilər.
Elm dünyası gün keçdikcə inkişaf edir. Belə ki, Stanford Universitetinin alimləri tərəfindən hazırlanan yeni elektron dəri texnologiyası bunun bariz nümunəsidir. Qeyd edək ki, yeni texnologiya ultra nazik stikerə bənzəyir. Həmçinin ultra nazik və şəffaf təbəqə 5 Voltluq enerji ilə təchiz edilib. Elektron dərinin 3 qatlı strukturu dielektrikdir yəni elektrik keçirmir. Həmçinin hər təbəqədə müxtəlif duyğu siqnallarını qəbul etmək üçün fərdi olaraq dizayn edilə bilən nanostrukturlar mövcuddur. Bu strukturlardan biri temperaturu aşkar edə bilir, digəri isə təzyiqi hiss etməyə kömək edir. Qeyd edək ki, hər təbəqənin qalınlığı 1 mikrondan azdır.
Laboratoriya siçanları üzərində aparılan sınaq zamanı tədqiqatçılar elektron dəri texnologiyasının stimullaşdırıblar. Belə ki, dəriyə təzyiq etmək, istilik tətbiq etmək və ya sinirin stimullaşdırıması reaksiyaya səbəb olur və toxunma hissi verir. Həmçinin yeni texnologiya yırtılma və ya zədələnmə qorxusu olmadan dəfələrlə əyilə və uzana bilər. Gələcəkdə yeni texnologiya protezlərə belə inteqrasiya edilə bilər. Təəssüf ki, hazırda yeni texnologiya üzvi materiallardan hazırlanır və qısamüddətlidir. Lakin gələcəkdə bu texnologiya insanların toxunma hissini daha uzunmüddətli bərpa edə bilər.
