WhatsApp ötən gün ən çox gözlənilən funksiyalarından birinin nəhayət istifadəyə verildiyini elan edib. Beləliklə, mesaj redaktə funksiyası da rəsmi olaraq hamı üçün messengerdə əlçatan oldu. Meta şirkətinin rəhbəri Mark Zukerberq Facebook-dakı paylaşımında bildirib ki, artıq WhatsApp istifadəçiləri mesajlarını göndərdikdən sonra 15 dəqiqə ərzində redaktə edə bilərlər.
İndiyədək WhatsApp istifadəçiləri ya mesajı tamamilə silməli, ya da ayrıca mesajda düzəliş edirdilər. Hətta keçən il söhbət proqramı mesajın silinməsi üçün lazım olan vaxtı 48 saatdan 60 saata qədər artırmışdı. WhatsApp-ın Telegram və Signal kimi rəqibləri uzun müddətdir ki, mesajları vaxt məhdudiyyəti olmadan redaktə etmək imkanı təklif edirlər. Apple belə iOS 16-da iMessage vasitəsilə göndərilən mesajları redaktə etmək və ləğv etmək imkanını təqdim etmişdi. Hətta Twitter keçən il ödənişli istifadəçilər üçün redaktə düyməsini aktivləşdirmişdi. Yeniliyi isə ən son gətirən WhatsApp oldu.
Mesajı redaktə etmək üçün mesaja toxunub saxlamaq və sonra redaktə düyməsini sıxmaq lazımdır. Redaktə edilmiş mesajlar vaxt damğasının yanında “redaktə edilmiş” kimi qeyd olunacaq, lakin proqram düzəlişlərin tarixçəsini saxlamayacaq və digər istifadəçilər redaktə edilmiş mesajların əvvəlki versiyalarını görə bilməyəcək. Meta xəbər verir ki, redaktə funksiyası artıq istifadəçilərə təqdim edilib və bir neçə həftə ərzində hamı üçün əlçatan olacaq.
