Avropa Birliyi parlamenti və Avropa İttifaqı komissiyası Şengen zonası ölkələri üçün artıq viza prosedurunun rəqəmsal olacağını bildirib. Ümumiyyətlə hər il milyonlarla turistin müraciət etdiyi Şengen vizası indiyə qədər çox çətin prosedura sahib idi. Lakin artıq pasportlara yapışdırılan bu vizalar 2D barkod şəklində olan rəqəmsal viza ilə əvəz olunacaq. Bu isə viza prosedurunun daha asan olacağından xəbər verir. Qərar qüvvəyə mindikdən sonra artıq viza proseduru konsolluqda deyil, internet saytında həyata keçiriləcək.
Şengen vizasının tamamilə rəqəmsal olması viza ərizəçiləri üçün müxtəlif imkanlar yaradır. Belə ki, ərizəçilər tək bir sayt üzərindən müxtəlif dillərdə viza müraciəti edə bilərlər. Bundan əlavə Şengen vizası sahibləri öz rəqəmsal vizalarını mobil cihazlarına da yükləyə biləcəklər. Sloveniya Parlamentarisi olan Majtaz Nemec müsahibə zamanı “Müraciət edənlər artıq daha asan, daha ucuz və daha sürətli viza prosedurlarından faydalanacaqlar” deyə bildirib. Həmçinin İsveçin İmmiqrasiya Naziri Maria Malmer bildirib ki, yeni qərar vizaların kopyalanması, saxtalaşdırılması riskini daha da azaldaraq Şengen bölgəsinin təhlükəsizliyini artıracaq.
Yeni qərar əsasən viza prosedurunun rəqəmsallaşdırılması tədricən olacaq. Belə ki, 2025-ci ilə qədər bütün viza prosedurunun rəqəmsallaşdırılması nəzərdə tutulub. Həmçinin yeni qərara əsasən avropa birliyi ölkələri 5 il ərzində öz milli sistemlərindən imtina edərək, ortaq rəqəmsal platformaya keçməlidirlər. Yeni viza qərarının növbəti 5 ildə daha çox turistin müraciət etməsinə səbəb olacağı da gözlənilir. Lakin hələlik prosedurun şərtlərinin eyni qaldığı bildirilir.
