Yəqin ki, son zamanlar Çin və Tayvan arasında gərginliyin xeyli artdığını görmüsünüz. Tayvan texnologiya dünyası üçün əhəmiyyətli ölkələr siyahısında bəlkə də birinci yerdədir. Dünyanın ən məşhur çip istehsalçısı TSMC məhz Tayvan mərkəzli bir şirkətdir. TSMC şirkətinin müştəriləri arasında isə Qualcomm, Apple, Mediatek, NVIDIAkimi nəhənglər yer alır. Ən sadə dildə desək 5nm, 3nm, 7nm və.s tipli adlandırdığımız texnoloji proses məhz TSMC şirkətindən təmin edilir. TSMC şirkətinin yaşayacağı problemlər bütün dünyada texnologiya sahəsində dəhşətli bir böhrana səbəb ola bilər. TSMC şirkətinin də ilk pillədə yerləşən müştərisi hamının bildiyi kimi Apple firmasıdır. Texnologiya sahəsində Çinin əsas rəqiblərindən biri olan Apple öz smartfonlarında məhz TSMC şirkətinin texnoloji prosesi ilə istehsal etdiyi Bionic çipsetlərini quraşdırır. Ona görə də başda Amerikalı şirkətlər olmaqla çoxları TSMC şirkətinin gələcəyindən narahatdır.
Şirkətin rəhbəri Mark Liu Çin Tayvana hücum etsə “itirən dünya olacaq” mesajını verib!
Belə ki, şirkətin rəhbəri Mar Liu Çin Tayvanı işğal edəcəyi təqdirdə fəaliyyətini dayandıracağını bildirir. Şirkətin fəaliyyəti qlobal tədarük zəncirindən aslı olduğu üçün ölkəyə müdaxilə olacağı təqdirdə şirkət işləyə bilməyəcək. Liu bildirir ki, TSMC-nin istehsalatı inkişaf prosesindən istehsala qədər Avropa, Yaponiya, Amerika ilə əlaqəlidir və dünyada yarımkeçirici məhsullar bazarının 50%-lik hissəsini təkcə əlinə alır. Bir sözlə şirkət rəhbəri “müharibədə qazanan olmayacaq və hamı uduzacaq” deyə bildirib.
TSMC şirkəti Arizona fabrikini tamamlamaq üzrədir!
Amerika isə qətiyyən TSMC şirkətini itirə bilməz. Ona görə də 12 milyard dollarlıq yeni fabrik artıq ABŞ-da 5 nanometrlik çipləri kütləvi istehsal etməyə başlamağa hazırlaşır. Apple şirkətinin A14 Bionic və M1 çiplərinin hamısı 5 nanometrlik texnoloji prosesə hazırlanır. LinkedIn yazısında TSMC şirkəti qeyd edib:
Phoenix, Arizona şəhərində 5 nanometrlik texnoloji proses istehsal edəcək “FAB 21”-də böyük irəliləyişlər davam edir. Biz bu yaxınlarda yerli tərəfdaşlarımızla birlikdə FAB 21-in tikintisində son toxunuşları da edərək nailiyyətimizi qeyd etdik. 4000-dən çox iştirakçı, öz əməkdaşlarımız və tərəfdaşlarımız da daxil olmaqla, bu mühüm andan həzz almaq üçün hazır idi. TSMCArizona ən qabaqcıl yarımkeçirici texnologiyalarını ABŞ-a gətirmək üçün yoldadır. Biz tərəfdaşlarımıza dərin minnətdarlığımızı bildiririk və Arizonada daha uğurlu gələcək gözləyirik.
Mark Liu şirkətin Arizona zavodunun 2024-cü ilin birinci rübündə kütləvi istehsala başlayacağını elan edib. Arizona fabrikində hazırlanan çiplərin ehtimal olunan müştəriləri arasında Nvidia, Qualcomm və Apple var. Yeni Arizona zavodu, Apple şirkətinin 5 nanometrlik xüsusi silikon çiplərinin ilk dəfə ABŞ-da istehsalını nəzəri cəhətdən mümkün edəcək.
Apple şirkətinin M2 Pro və ya M3 çipindən başlayaraq 3nm prosesinə kecəcəyi şayiələri var. iPhone 14 Pro modelində isə A16 çipinin 5 nanometrlik istehsal prosesi ilə istehsalına davam edəcəyi gözlənilir. Buna görə də çox güman ki, Arizona zavodu kütləvi istehsal üçün açılanda 2024-cü ilin əvvəlinə qədər Apple hələ də 5 nanometrlik çiplərə ehtiyac duyacaq. Mövzu haqqında düşüncələrinizi bizimlə paylaşmaqı unutmayın!
