Dünyanın ən çox istifadə edilən internet brauzerlərindən biri olan Mozilla Firefox, təəccüblü bir ittiham ilə gündəmə gəlib. Belə ki, Mozilla, Firefox brauzeri vasitəsi ilə istifadəçilərini icazəsiz olaraq izləməkdə ittiham olunur.
Xatırladaq ki, Mozilla, yayımladığı Firefox 128 versiyası ilə birlikdə “Privacy-Preserving Attribution” adlı yeni sistemi bizlərə təqdim etmişdi. Vyanada yerləşən NOYB (None Of Your Business) bu yeni funksiyanı bəyənməyərək, onun istifadəçi hərəkətlərini icazəsiz izləndiyini iddia edib. Hətta NOYB bu barədə Avstriyanın məlumatların mühafizəsi orqanına da məlumat verərək Mozilla-nı şikayət edib. İstifadəçilərə standart olaraq təklif edilən Privacy-Preserving Attribution adlı xüsusiyyət barəsində isə Kaspersky mənbəsi də yazı paylaşıb. Bu yazı da isə xüsusiyyətin çalışma prinsipi belə açıqlanır: “Veb-sayt brauzerdən uğurlu reklam nümayişi nümunələrini yadda saxlamağı xahiş edir. İstifadəçi saytı faydalı hesab edərək bir hərəkət edərsə məsələn, məhsul alarsa, sayt istifadəçinin reklamı görüb-görmədiyini öyrənmək üçün brauzerə sorğu göndərir. Brauzer sayta heç nə demir, DAP protokolu vasitəsilə məlumatları toplama serverlərinə göndərir. Bütün bu hesabatlar aqreqatorlarda toplanır və sayt vaxtaşırı xülasə alır. Nəticədə sayt öyrənir ki, müəyyən bir reklamı görən X sayda istifadəçidən Y sayda istifadəçi sayt üçün faydalı hesab edilən hərəkətlər edib. Lakin nə sayt, nə də toplama sistemi bu istifadəçilərin kim olduğunu, internetdə daha nə işlə məşğul olduqlarını və s. bilmir”.
Mozilla-nın öz bəyanatında isə deyilir ki, “Bu funksiya, saytlara ayrı-ayrı insanlar haqqında məlumat toplamadan reklamlarının necə performans göstərdiyini anlamağa kömək etmək üçün nəzərdə tutulub”. Mozilla tərəfindən verilən açıqlamaya əsəsan kağız üzərində faydalı görünən sistem, NOYB-nin məlumatına görə, hələ də Avropa Birliyi məxfilik qanunları çərçivəsində istifadəçi hüquqlarına müdaxilə edir. NOYB bu funksiyanın istifadəçilərə standart olaraq təqdim edilməsini də mənfi olaraq qiymətləndirir.
