Google şirkəti bu dəfə süni intellekt istifadə edərək ətraf mühit üçün daha bir əhəmiyyətli addım ataraq metan qazını izləyəcək. Belə ki, texnologiya nəhəngi metan qazını izləmək üçün həm də peyk görüntülərindən istifadə edəcək. Ümumiyyətlə qlobal istiləşmə mövzusu açıldıqda, ən çox “karbon dioksid emissiyaları” vurğulanır, lakin prosesi sürətləndirən başqa amillər də var. Məsələn, Beynəlxalq Enerji Agentliyinin məlumatına görə, metan qlobal miqyasda müşahidə olunan əsas temperatur artımlarının təxminən 30 faizinə cavabdehdir.
Qeyd edək ki, insanların yaratdığı metan emissiyalarının təxminən 40%-i enerji sektorundan gəlir. Bu emissiyaların aşkarlanması və azaldılması iqlim dəyişikliyi ilə mübarizə üçün qısa müddətdə görülə biləcək ən kritik tədbirlərdən biri kimi qiymətləndirilir. Bu məqsədlə, Google və EDF metan emissiyalarını azaltmaq üçün yenidən əməkdaşlıq ediblər. İkili daha əvvəl Street View avtomobillərindəki sensorların köməyi ilə böyük şəhərlərdə metan sızmalarının xəritəsini çəkmişdilər. Bu dəfə isə Google və EDF yəni, Ətraf Mühitin Müdafiəsi Fondu metan qazını izləmək üçün süni intellekt və peyk görüntülərindən istifadə edəcəklər.
NASA-nın məlumatlarına görə, son 200 ildə iki dəfədən çox artan atmosferdəki metan konsentrasiyasının 60 faizi insan fəaliyyəti, 40 faizi isə təbii səbəblər (inək, keçi və maral kimi kənd təsərrüfatı heyvanları) ilə bağlıdır. Beynəlxalq Enerji Agentliyinin məlumatına görə isə, 2022-ci ildə metan qazı emissiyaları 589,1 milyon ton olub. Bunun 395,1 milyon tonunun insan fəaliyyətinin, 194 milyon tonunun isə təbii imkanların hesabına olduğu bildirilir. Peyk əsaslı monitorinq əvvəllər də aparılsa da, martın əvvəlində orbitə buraxılacaq MethaneSAT-ın bütün planetdə metan emissiyalarının ən əhatəli görünüşünü təmin edəcəyi gözlənilir.
