Apple iPhone və digər Apple cihazlarında ağıllı köməkçi olan Siri-ni səslə aktivləşdirmək üçün istifadə edilən Hey Siri əmrini sadələşdirir. Belə ki, məşhur Apple analitiki olan Mark Gurman bu barədə Bloombergdə məlumat verib. Onun sözlərinə görə Apple şirkəti bir neçə aydır ki, Hey Siri əmrini sadələşdirmək üzərində çalışır. Şirkət 2 sözdən ibarət olan ifadədən Hey sözünü ataraq sadəcə Siri sözü ilə ağıllı köməkçinin işə düşməsini planlayır.
Bu bizə çox kiçik bir dəyişiklik kimi görünsə də, Gurmanın sözlərinə görə bu, əhəmiyyətli dərəcədə mühəndislik işi tələb edir. Məhz bu səbəbdən bu dəyişikliyin gələn il və ya 2024-cü ildə həyata keçiriləcəyi gözlənilir. Şirkəti Hey Siri əmrini dəyişməyə vadar edən bir neçə səbəb var. Belə ki, bunlardan biri Amazon-un Alexa köməkçisinin, həmçinin Microsoft-un Cortana köməkçisinin yalnız 1 sözdən ibarət əmr ilə işə düşməsidir. Apple bu dəyişiklik ilə Amazon və Microsoft ilə ayaqlaşmaq istəyir. Siri-nin sadəcə 1 sözdən ibarət əmr ilə işə düşməsi şirkəti Google-dan daha önə salacaq. Çünki, Google köməkçisi hələ də Hey Google əmri ilə işə düşür.
Gurmanın sözlərinə görə, Apple Siri barəsində sadəcə bu dəyişikliyi etmir. Şirkət həmçinin ağıllı köməkçini təkmilləşdirməyi hədəfləyir. Belə ki, Siri bu təkmilləşdirmə sayəsində üçüncü tərəf proqram və xidmətlərə daha dərindən inteqrasiya olacaq. Yeni Sirinin səsinin dəyişilib-dəyişilməyəcəyi barədə hələlik məlumat yoxdur. Lakin Apple bu ilin əvvəlində kişi və qadın səsinə bənzəməyən neytral bir səs yaratmışdı. Şirkətin hal-hazırda təkmilləşdirdiyi ağıllı köməkçinin yeni səsi bu il təqdim olunmuş yeni neytral səs ola bilər.
