İlk öncə qeyd etmək lazımdır ki, süni intellektə əsaslanan NVIDIA tətbiqləri dedikdə NVIDIA Broadcast, NVIDIA Canvas, NVIDIA Omniverse kimi tətbiqlər başa düşülür. Belə ki, bu tətbiqlərin hərbirinin özünəməxsus xüsusiyyətləri və funksiyaları mövcuddur. NVIDIA Broadcast tətbiqi istifadəçilərin kamera və mikrofonlarını süni intellekt ilə təkmiləşdirərək studiya keyfiyyətindəki kamera və mikrofonlara çevirir. NVIDIA Canvas tətbiqi süni intellekt ilə sizin cızma-qaranızı möhtəşəm mənzərəyə çevirir. Nəhayət NVIDIA Omniverse tətbiqi isə süni intellektin köməyi ilə 3D səhnələrin montajı habelə modelləşdirilməsində istifadəçilərə köməklik edir. Gördüyünüz kimi hər üç tətbiqin əsasında məhz süni intellekt dayanır.
Qeyd edə bilərik ki, süni intellekt texnologiyasından ən çox və ən düzgün istifadə edən şirkətlərdən biri NVIDIA-dır. Bildiyimiz kimi, NVIDIA bu tətbiqlərdən əlavə olaraq həmçinin DLSS texnologiyasının da müəllifidir. DLSS texnologiyası barəsində bilmirsinizsə saytımızdakı məqalələr bbölməsinə keçid edə bilərsiniz. Hansı ki, süni intellekt texnologiyaları hesabına burada da istifadəçilər ciddi üstünlüklər qazanırlar. Bu məqaləmizdə isə biz süni intellektə əsaslanan NVIDIA tətbiqləri barədə detallı danışacağıq.
NVIDIA Broadcast tətbiqi nədir və hansı xüsusiyyətlərə malikdir?
Süni intellektə əsaslanan NVIDIA tətbiqləri barədə danışarkən ilk öncə Broadcast tətbiqindən başlamalıyıq. Çünki, bu tətbiq ən çox istifadə edilən NVIDIA tətbiqlərindən biridir. Qeyd etdik ki, bu tətbiq istifadəçilərin kamera və mikrofonlarını süni intellekt ilə təkmiləşdirərək studia keyfiyyətindəki kamera və mikrofonlara çevirir. İndi isə bu ifadəni daha da ətraflı izah edək. Belə ki, NVIDIA Broadcast tətbiqi süni intellekt vasitəsilə arxa plandakı səs-küyü aradan qaldıra bilən, kameranıza xüsusi arxa plan effektləri əlavə edə bilən tətbiqdir. Bu tətbiq ilə istənilən məkanda və istənilən şəraitdə öz studianızı qura bilərsiz. Lakin bu tətbiqdən istifadə etmək üçün süni intellekt ilə işləyə bilən GeForce RTX, Quadro RTX və ya Titan RTX qrafik kartlarından birinə sahib olmaq lazımdır. Bundan əlavə isə dizüstü və ya masaüstü kompüteriniz minimum 8GB RAM və Intel Core i5 8600 və ya AMD Ryzen R5 2600 prosessora sahib olmalıdır.
NVIDIA Broadcast tətbiqi əsasən Twitch, Discord yayımı edənlər və ya musiqiçilik ilə məşğul olan şəxslər tərəfindən istifadə edilir. Çünki, tətbiq canlı yayımda səs-küyün azaldılması, əks-sədanın ləğvi, portre rejimi və kamera görüntüsünün yaxşılaşdırlması kimi mühüm xüsusiyyətlərə sahibdir. Qeyd etmək lazımdır ki, tətbiq 3 kateqoriyaya bölünür: mikrofon, dinamiklər və kamera. Hər bir kateqoriya istifadəçilərə tamamilə fərqli funksiya və parametr təklif edir.
NVIDIA Broadcast tətbiqinin kateqoriyaları
NVIDIA Broadcast tətbiqi açılarkən qarşımıza gələn ilk kateqoriya məhz mikrofon kateqoriyasıdır. Bu kateqoriyadan istifadə etmək üçün əlavə qurğuya ehtiyac yoxdur. Belə ki, siz kompüterinizin daxili mikrofonu və ya xarici mikrofonu ilə bu konfiqurasiyadan istifadə edə bilərsiniz. Lakin tətbiqdən istifadə etmədən öncə “Mikrofon Mənbəsi”-ni qeyd etmək lazımdır. Daha sonra isə bu kateqoriya üçün uyğun olan 2 effektdən birini seçmək lazımdır. Bu effektlərə Səs-küyün və Əks-sədanın aradan qaldırılması aiddir.
- Səs-küyün aradan qaldırılması: Bu effektdən istifadə edərkən arxa plandakı əlavə səslər aradan qalxacaq. Hətta klaviatura, kondisaner və sairə kimi həssas səslər də süni intellekt tərəfindən aşkar edilir və aradan qaldırılır.
- Əks-sədanın aradan qaldırlması: Bu effekt isə boş otaqda olarkən yaranan əks-sədanın qarşısını alır. Həmçinin qeyd edə bilərik ki, bu effekt studiya effekti də yaradır.
Broadcast tətbiqinin digər kateqoriyalarından biri isə dinamiklərdir. Bu kateqoriya isə yuxarıda sadaladığımız effektləri video zəng və ya video konfransdakı digər insanların səsinə tətbiq edir. Nəticədə isə tətbiq istifadəçisi video konfransdakı insanların səslərini daha təmiz eşidir. Bu kateqoriyadan istifadə etmək üçün də ilk öncə Səs çıxışını seçmək lazımdır. Daha sonra isə səs-küyün azaldılması və ya əks-sədanın aradan qaldırılması effektlərindən birini seçmək lazımdır.
Nəhayət tətbiqin sonuncu kateqoriyası kameradır. Bu kateqoriyada da ilk öncə kamera mənbəsini seçmək lazımdır. Daha sonra isə aşağıdakı effektlərdən birini seçmək lazımdır.
- Arxa Fon Bulanıqlığı: Adından göründüyü kimi bu effekt ilə süni intellekt arxa planı aşkar edərək onu bulanıqlaşdırır. Beləliklə sadəcə istifadəçi ekranda görünür. Bu həm də portret rejimi də adlandırılır.
- Arxa Fonun dəyişdirilməsi: Bu effekt ilə süni intellekt arxa fonu müəyyənləşdirir və süni mənzərə və ya şəkillər ilə onu əvəz edir.
- Video keyfiyyətinin yaxşılaşdırılması: Bu effekt isə xüsusilə qaranlıq şəraitdə və ya keyfiyyətsiz kameralar ilə çəkilən videolar zamanı ekranda yaranan xırda pikselleri aradan qaldırmaq mümkündür.
- Avtomatik çərçivələmə: Bu effekt ilə süni intellekt, istifadəçinin üzünü aşkar edir və videonu avtomotik olaraq onun üzünə uyğun olaraq çərçivələyir. Əlavə olaraq isə kamera miqyasını tənzimləmək mümkündür.
NVIDIA Broadcast tətbiqi hansı proqramlarda istifadə oluna bilər?
NVIDIA Broadcast tətbiqi həmçinin bir sıra proqramlarda da istifadə oluna bilər. Belə ki, bu proqramlara Discord, OBS Studio, Streamlabs, XSplit, Twitch, Zoom, Skype, Microsoft Teams və digərləri aiddir. Zoom, Skype, Microsoft Teams kimi video konfrans proqramlarında bu tətbiqin istifadəsi geniş yayılmışdır. Həmçinin Discord, OBS studio kimi yayım proqramlarında da canlı olaraq tətbiqinin funksiyalarından istifadə etmək olar. Gəlin ən çox istifadə olunan Discord proqramında tətbiqdən istifadə qaydasını izah edək.
Discord proqramında NVIDIA Broadcast necə istifadə olunur?
- Proqrama daxil olduqda ilk öncə parametrləri açmaq lazımdır
- Sonra isə mikrofon mənbəyi və dinamik çıxışlarından NVIDIA Broadcast seçmək lazımdır.
- Həmçinin daha yaxşı performans üçün Discord-un Səs-küy azaltma (Noise Reduction) funksiyasını deaktiv etmək lazımdır.
NVIDIA Canvas tətbiqi və onun xüsusiyyətləri
Süni intellektə əsaslanan digər NVIDIA tətbiqi də Canvasdır. Belə ki, NVIDIA Canvas tətbiqi sadə eksizləri süni intellekt vasitəsi ilə möhtəşəm sənət əsərlərinə çevirir. Tətbiqin əsas məqsədi isə rəssamların tez bir zamanda ideyalar yaratmasına imkan verməkdir. Həmçinin bu tətbiqdən dizaynerlər, habelə oyun hazırlayan şəxslər də istifadə edə bilər. Saatlarla mükəmməl və yaradıcı mənzərə və ya əsər axtarmaq əvəzinə NVIDIA Canvas vasitəsi ilə sadəcə bir neçə dəqiqə ərzində öz əsərini yarada bilərsən. Qeyd edək ki, bu tətbiqdən istifadə etmək üçün GeForce RTX, NVIDIA RTX və Titatn RTX qrafik kartlarına sahib olmaq lazımdır. Bundan əlavə isə kompüter minimum 4 GB RAM və Windows 10 əməliyyat sisteminə sahib olmalıdır.
NVIDIA Canvas tətbiqi həmçinin canlı olaraq istifadəçinin çəkdiyi şəkili və ya əsəri nümayiş edir. Əgər istifadəçi çəkdiyi əsərdə nəyisə bəyənməsə həmin dəqiqə dəyişiklik edə bilər. Tətbiqin ən mühüm xüsusiyyətlərindən biri odur ki, siz şəklinizi tam olaraq fərdiləşdirə bilərsiz. Yəni Canvas istifadəçiyə bir neçə üslub və ya seçim təklif edir. Belə ki, alətlər qutusunda 15 növ material mövcuddur. Bunlara ot, su, bulud, duman və sairə kimi mühüm elementlər daxildir. Şəkili çəkmək üçün sadəcə alətlərdən birini seçərək ağ ekrana toxunmaq kifayətdir. Qeyd edək ki, materiallardan əlavə olaraq işıqlandırma, landşaft detallarını dəyişən təbəqələr və üslublar mövcuddur. Daha izahlı desək standart rejimdə 9 üslub, panorama rejimində isə 8 üslub mövcuddur.
NVIDIA Canvas tətbiqi həmçinin istifadəçilərə Panoramik Mənzərələri çəkməyi də təklif edir. Belə ki, rəssamlar tez bir zamanda 360° mənzərə şəkli çəkə bilər. Həmçinin çəkilən şəkili istənilən 3D tətbiqinə ixrac etmək mümkündür. İstifadəçilər istifadə etdiyi materialları və ya üslubları həm ayrı-ayrılıqda həm də birlikdə Blender, Adobe Photoshop kimi 3D proqramlara ixrac edə bilər. Qeyd edək ki, NVIDIA Canvas tətbiqini hazırlayarkən 5 milyon mənzərə şəkli istifadə edərək süni intellekti formalaşdırıb.
NVIDIA Omniverse tətbiqi və onun xüsusiyyətləri
Süni intellektə əsaslanan NVIDIA tətbiqləri siyahısında sonuncu yeri məhz NVIDIA Omniverse tətbiqi tutur. Qeyd edək ki, NVIDIA Omniverse fərdi şəxslərə və ya komandalara Universal Səhnə Təsvirinə (USD) əsaslanan 3D proqramları inkişaf etdirməyə imkan verən tətbiqdir. Daha aydın izah versək deyə bilərik ki, Omniverse metaverse proqramları qurmaq və idarə etmək üçün nəzərdə tutulan tətbiqdir. Metaverse dedikdə ilk ağla gələn məhz virtual dünya və 3D modellərdir. Ümumiyyətlə Omniverse tətbiqi əsasən biznes fəaliyyətlərini inkişaf etdirmək üçün nəzərdə tutulub. Burada isə süni intellekt 3D modellərin yaradılmasını sürətləndirmək, habelə sintetik məlumatlar yaratmaq kimi funksiyaları həyata keçirərək istifadəçilərə kömək edir. Qeyd edək ki, Omniverse USD əsaslı iş axınlarını qəbul etmək üçün ən mühüm platforma hesab olunur. Yəni Metaverse kimi böyük dünyanın yaranması və inkişafında məhz Omniverse tətbiqinin payı böyükdür.
Omniverse bir çox imkan təklif edir. Belə ki, bu imkanlara MDL (Material Definition Language), PhysX, Süni intellekt, RTX, USD, aiddir. Gəlin bu imkanların hər birini izah edək.
- MDL və ya Material Definition Language– dəqiq materialları təsvir edərək 3D simulyasiya edir.
- PhysX– üçölçülü kompüter mühitində hər cür fiziki hadisələrin işlənməsi və modelləşdirilməsi üçün əlavə qrafik mühərrikdir.
- Süni İntellekt– dünyaların qurulmasını və ya avtonom şəkildə yaradılmasını dəstəkləyərək, proqnozlar verir və prosesləri avtomatlaşdırır.
- RTX və ya Ray Tracing Texel eXtreme– işıq və maddəni fiziki olaraq dəqiq və real vaxtda simulyasiya etmək üçün süni intellekt sistemi ilə birləşdirilmiş hibrid render mühərrikidir
- USD və ya Universal Səhnə Təsviri– Pixar tərəfindən hazırlanmış daha sonra animasiya dünyası üçün 3D məlumatların ötürülməsində istifadə olunan çərçivədir.
Texnologiya şirkətləri NVIDIA Omniverse tətbiqinin imkanlarından necə istifadə edə bilər?
Texnologiya şirkətləri metaverse proqramları, mikroservislər hazırlamaq üçün Omniverse tətbiqindən istifadə edə bilərlər. Belə ki, Omniverse istifadəçilərə geniş çeşidli alətlər təklif edir. Ümumiyyətlə deyə bilərik ki, NVIDIA Omniverse süni intellekt ilə real dünyanın bir araya gəldiyi platformadır. Çünki, Omniverse vasitəsi ilə şirkətlər hər bir obyektin, canlının və prosesin rəqəmsal əkizini yarada bilərlər. Bu isə Digital Twıns adlanır. Rəqəmsal Əkizlər əsasən avtomobil şirkətləri tərəfindən gələcəyin fabrikini və özünü idarə edə bilən avtomobillərini yaratmaq üçün geniş istifadə olunur. Həmçinin bu texnologiya ətraf mühitin və ya planetimizin rəqəmsal əkizini yaratmaqla hava şəraitini proqnozlaşdırmağa və ekoloji problemlər ilə mübarizə aparmağa kömək edir. Rəqəmsal əkiz texnologiyasının imkanları sonsuzdur. Çünki ondan bütün sahələrdə istifadə etmək olar.
NVIDIA Omniverse həmçinin Robotexnika sahəsinin inkişafına da kömək edir. Belə ki, gün keçdikcə yeni süni intellekt ilə çalışan robotlar meydana gəlir. Son olaraq qeyd edə bilərik ki, NVIDIA Omniverse Maliyyə və bank sektorunda da tətbiq olunur. Belə ki, o şirkətlərin fırıldaqçılıq əməliyyatlarını aşkar etmək, risklərin idarə edilməsi sahəsini təkmilləşdirmək kimi bir çox imkanlara da sahibdir.
Nəhaəy deyə bilərik ki, süni intellekt əsaslı NVIDIA tətbiqləri bu gün bir çox fərqli sahələrdə istifadə olunur. Gələcəkdə isə yeni süni intellekt əsaslı NVIDIA tətbiqləri yaradıla bilər. Ümumiyyətlə bu gün məqaləmizdə əsasən süni intellekt ilə çalışan NVIDIA tətbiqlərindən bəhs etdik və onların imkanlarından istifadə olunma sahələrindən habelə istifadə olunma qaydalarından bəhs etdik. Bir daha deyə bilərik ki, NVIDIA süni intellektdən ən düzgün və ən çox istifadə edən yeganə şirkətdir və bu qaçınılmazdır ki, yaxın gələcəkdə belə tətbiqlərin sayı artacaq.
