Hər birimizin gündə ən az bir dəfə ziyarət etdiyi, video izləmək istədiyimizdə ən çox istifadə olunan video izləmə servisi Youtube həyatımızın ayrılmaz parçası olub.
Sözü gedən platformanın qurucuları bir zamanlar PayPal-da birlikdə işləyirdilər və orada tanış olublar. Steve Chen, Chad Hurley ve Jawed Karim-in Youtube fikrini necə tapdıqları ilə bağlı bir çox hekayə var. Hekayələrdən hansının doğru, hansının doğru olmadığı bilinmir. Ən çox danışılan versiya budur ki, Chen-in San-Fransiskodakı evində axşam yeməyi zamanı çəkdikləri videoları paylaşmaqda çətinlik çəkən dostların ağlına Youtube fikri gəlib. Amma Hurley və Chen özləri bu hekayəni təsdiqləmir və həmin gün Karim heç orada olmayıb.
Təəccüblüdür ki, bu fikir o qədər də orijinal ideya deyildi. İnternetdə ilk video paylaşma platforması Vimeo idi və sonra YouTube Vimeo-nun bir çox xüsusiyyətlərini öz saytlarına inteqrasiya etdi. Vimeo, Jake Lodwick və Zach Klein-in CollegeHumor-u (komediya videoları olan sayt) hazırlayarkən işlədiyi yan layihə idi. Hətta Google belə 2005-ci ilin yanvarında video paylaşma platforması qurmağa çalışdı. Lakin kütlə yığa bilmədi.
Youtube-un təqdimatı və ilk videosu
2005-ci ilin fevral ayında şirkət YouTube.com-u Kaliforniyadakı ofislərindən istifadəyə verdi. 23 apreldə isə ilk video Jawed Karim tərəfindən sayta yükləndi. Platformanın test edilməsi üçün yüklənən “me at the zoo” başlıqlı videonun bu qədər məşhur olacağını bəlkə də bilmirdilər. İlk video sayta yükləndikdən sonra gündəlik sayta təxminən 30.000 ziyarətçi gəldiyi qeydə alındı.
2005-ci ilin noyabrında Nike bu servisdə marketinq potensialını görmüşdü və özü üçün bir kanal yaratdı. Onlar əvvəlcə kanala Mundial Ronaldinyo-nun baş rolda çəkildiyi reklamı yüklədilər və bu video şirkətin tarixində izlənmə sayı 1 milyona çatan ilk video oldu. Bu platforma uğurlu idi, lakin, bu uğur özü ilə birlikdə problemlər də gətirmişdi. Şirkət saytın trafikinin öhdəsindən gəlmək üçün daha çox kompüter və genişzolaqlı bağlantılar almağa məcbur idi. Müəllif hüquqları məsələlərinə görə Youtube məhkəməyə verilirdi. Bu səbəblərdən qurucuları platformanı satmaq qərarına gəldilər. Google Video-nun uğursuzluğundan sonra Google 2006-cı ilin noyabrında YouTube-u 1,65 milyard dollara səhmlər şəklində aldı.
