Startup Grind Baku tərəfindən bu gün Sabah.Lab Akselerasiya Mərkəzində bu ilin ilk görüşü baş tutdu. Startapların, innovativ insanların, təsisçilərin və yaradıcıların birliyi hesab edilən Startup Grind tədbirinin bu günə olan mövzusu “Azərbaycanda gələcəyin peşələri!” idi. Belə ki, görüşün ilk spikeri Gülnar Mirhüseynova oldu. Gülnar xanımla birlikdə Azərbaycan İKT-də gələcəkdə hansı peşələrin aktual olacağından, kadr çatışmazlığının qarşısını almaq üçün nələrin edilməsindən, yeni kadrların potensialının inkişafının artırılmasından, həmçinin Technest proqramının inkişaf prioritetlərindən, bu proqramdan kimlərin faydalana biləcəyindən və bu bu proqramın gələcək planlarından danışdıq. Eyni zamanda ən maraqlı məqam isə Gülnar xanımın süni intellekt sahəsinə keçidin və yeni kadrların yetişdirilməsinin vacibliyindən danışması oldu.
“Startup Grind” Gülnar Mirhüseynova – “Azərbaycanda gələcəyin peşələri!” | Tedroid Media
Startup Grind Baku tərəfindən bu gün Sabah.Lab Akselerasiya Mərkəzində bu ilin ilk görüşü baş tutdu. Belə ki, görüşün ilk spikeri Gülnar Mirhüsyenova oldu. Yaxşı bəs, Gülnar Mirhüsyenova “Azərbaycanda gələcəyin peşələri!” mövzusunda nələrdən bəhs etdi?
“Gülnar Mirhüseynova”-nın nitqindən ən diqqət çəkən məqamlar nələr oldu?
Hal-hazırda hamı İT sektorunda mütəxəssis olmasa da hamı rəqəmsallaşmanın fərqində olmalıdır. Məsələn, sadə bir nümunə göstərsək həkimlər belə İT mütəxəssisi olmasalar belə yeni nəsil tibbi texnologiyaları işlədə bilən rəqəmsallaşmış mühitlə ayaqlaşmış olmalıdırlar. Yəni sırf İT mühitini nümunə götürsək, geriyə dönüb baxdıqda şirkət daxilində texnologiya ilə əlaqədar bir problemin həlli üçün ancaq 1 nəfər İT “helpdesk” olardı və hamı nəyisə ondan istəyərdi. İndi isə böyük şirkətlərin 3-5 böyük departamentində 100-150 işçi çalışır. Siz öz kompüterinizdə hansısa problemi həll etmək üçün İT mühəndisini axtarıb tapana qədər birinə yaxınlaşırsınız sistem mühəndisi olduğunu deyir, digərinə yaxınlaşırsınız front-end tərtibatçısı olduğunu deyir, özünüzə lazım olan adamı axtarana kimi o qədər fərqli İT ilə əlaqədar ixtisas sahibini görürüsünüz ki, artıq rəqəmsallaşmış mühitin yeni peşələri necə formalaşdırdığını anlamaq olur.
Əslinə qalsa, siz hələ də Excel ilə işləyirsinizsə bəlkə də 10 il sonra fəaliyyətiniz böyük şirkətlər üçün yararsız olacaq. Bu gün dataların işlənməsindən danışırıq və böyük şirkətlərdə onların həcmi də çox böyükdür. Elə bu gün belə bu dataların işlənməsini, kateqoriyalaşdırılmasını qısa vaxt ərzində etmək üçün güclü alqoritmlər və bu alqoritmləri işlədə bilən insanlar lazımdır. Məsələn, çox maraqlı bir sitatı nümunə gətirəcəm, “Süni intellekt sizi əvəz etməyəcək, süni intellekti işlədə bilən insan sizi əvəz edəcək!”. Yəni, çoxları ilə həmsöhbət olsanız süni intellekt işləri yox edəcək deyə danışdığını görə bilərsiniz. Lakin işin əslində elə dataların işlənməsində belə bizə süni intellekti işlədə bilən və hətta süni intellekt alqoritmlərini yarada bilən bacarıqda insanlar lazımdır. İstifadə etdiyimiz genişmiqyaslı potensiala malik süni intellekt sistemləri ölkəmiz tərəfindən demək olar ki, sıfırdan hazırlanmır. Xaricdən gətirilir və istifadə ediləcək sektor üzrə uyğunlaşdırılır. Gələcəyin, hətta yaxın gələcəyin peşə sahibləri bu problemləri həll edəcək potensiala inkişaf etməyə çalışmalıdırlar.
Təlim verdiyimiz proqramlar daxilində bəzi innovativ sahələr üzrə dərs deyə biləcək kadr tapmaq belə bəzən mümkünsüz olur. Məsələn, blokçeyn, solidity, metaverse, web 3.0 sahələri üzrə dərs deyən insan tapmaq çox çətindir. Əksər hallarda siz bu sahədə ixtisas sahibi yetişdirmək üçün xaricdən kimisə gətirməlisiniz. Digər bir tərəfdən isə bu barədə peşəkar təlimçi tapsanız belə bəzən bu mövzuları tədris etməyi bacarması mümkün olmur. Qısa olaraq tamamlasaq, gələcəyin müəllim peşəsi belə bu növ rəqəmsal mövzular üzrə müəllimliyi bacarmaqdan keçə bilər.
Gülnar Mirhüseynova
Gülnar Mirhüseynova ilə olduqca maraqlı keçən tədbirlə bağlı daha çox detal öyrənmək və maariflənmək istəyirsinizsə, yuxarıdakı tədbirin podkast səs yazısını dinləyə bilərsiniz. Qeyd edək ki, növbəti tədbirimiz 21 yanvar sabah.lab-da saat 13:00 etibarilə baş tutacaq və mövzumuz Nicat Zeynalovun nitqindən OpenAI-nin digər neyron şəbəkələrdən nə ilə fərqləndiyini, şəbəkəyə Azərbaycandan necə qoşulmaq olar, onun yerli mütəxəssislər üçün hansı imkanlar açdığını və bu istiqamətdə bizi hansı gələcək gözlədiyindən ibarət olacaq. Qeydiyyat üçün yerlər məhduddur.
Startap ekosistemi xəbərlərini "İnformasiya və Rəqəmsal İnkişaf Agentliyi" ilə tərəfdaşlığımız çərçivəsində oxuyursunuz.
