Texnoloiya sahəsindəki lider ölkələrdən biri olan Yaponiya 2025-ci ilə qədər kosmosdan yerə günəş enerjisi ötürməyi planlayır. Bir çox ölkə alternativ enerji axtarışında olsa da, Yaponiya artıq uzun illərdir ki, günəş enerjisini araşdırır. Beləliklə kosmosdakı günəş enerjisi potensialının fərqində olan yaponlar həmin enerjidən istifadə etmək niyyətindədir. Məhz bu məqsədə çatmaq üçün yaponlar 2009-cu ildən bəri araşdırmalar aparır. Lakin hazırlıq mərhələsini bitirən Yaponiya artıq kosmosda sınaqlar aparacaq. Hətta Yapon alimləri bu layihənin 2025-ci ilə qədər reallaşacağına inanır.
Ümumiyyətlə günəş enerjisi alternativ enerjilər arasında ən əhəmiyyətlisi hesab olunur. Lakin günəş panellərinin əsas mənfi cəhətləri gecələr və buludlu havalarda enerji istehsal etməməsidir. Yaponiya isə bu problemlərin aradan qaldırılmasının həllini kosmosda quraşdırılan günəş enerjisi stansiyalarında görür. Belə ki, kosmosda istənilən zaman günəşdən enerji əldə etmək mümkündür. Hətta Yaponiyanın Kosmik Tədqiqatlar Agentliyi JAXA-dan verilən açıqlamaya görə kosmosa kiçik peyklər buraxılacaq. Kyoto Universiterinin professoru Naoki Shinoharanın rəhbərlik etdiyi layihə çərçivəsində kosmosa buraxılacaq bu peyklər kosmosda günəş enerjisi əldə etməyə çalışacaq.
Kosmodakı günəş enerjisinin yerə ötürülməsi möhtəşəm səslənsə də, bu layihənin reallaşması üçün böyük vəsait tələb olunur. Hətta Yaponiya alimlərinin günəş enerjisi layihəsindəki əsas problem də məhz budur. Lakin ötən günlərdə taxta peyklər layihəsi bu problemin aradan qaldırılmasına səbəb ola bilər. Belə ki, maqnoliya ağacından hazırladan peyklər kosmosda 10 ay ərzində heç bir maneəyə rast gəlməmişdi. Məhz bu layihə çərçivəsində Yaponiya öz ideyasını 2025-ci ilə qədər reallaşdıra bilər.
