Müasir dövrün əsas problemlərindən biri olan saxta məhsulları artıq asanlıqla aşkar etmək olacaq. Belə ki, Alitheon tərəfindən hazırlanmış süni intellekt əsaslı FeaturePrint tətbiqi saxta məhsulları asanlıqla aşkar edə biləcək. Qeyd edək ki, saxta məhsullar keyfiyyət və təhlükəsizlik standartlarına cavab vermədiyi üçün istehlakçıların sağlamlığı və təhlükəsizliyi üçün əhəmiyyətli risklər yaradır. Müasir dövrdə bu saxta məhsulları istənilən sahədə görmək mümkündür. İstehlakçılar əsasən ucuz olduğu üçün saxta məhsullara üstünlük verir. Lakin bəzən istehsalçılar saxta məhsullar ilə fırıldaqçılıq etməyə çalışır. Yeni tətbiq məhz bu fırıldaqçılıqların qarşısına keçməyə kömək edəcək.
Süni intellekt əsaslı FeaturePrint tətbiqi məhsulun müxtəlif xüsusiyyətlərini nəzərdən keçirərək onun saxta olub-olmadığını aşkar edir. Belə ki, yeni tətbiq ilkin mərhələdə sadəcə bir şəkil ilə saxta əsərləri aşkar etmək üçün istifadə olunacaq. Qeyd edək ki, sənət əsərləri ən çox fırıldaqçılıq edilən məhsullardandır. Çünki, əsərlərin saxta olub olmadığını aşkar etmək çox çətindir. Lakin yeni süni intellekt əsaslı tətbiq bu işin öhdəsindən gələcək. Alitheon bildirir ki, tətbiq şəkili riyazi identifikatora çevirərək təhlil edir. Həmçinin bu identifikasiya prosesi təsvirə deyil, obyektin xarakterik xüsusiyyətlərini təhlil edən rəqəmlər toplusuna əsaslanır.
Barkod, QR kod və RFID etiketlərinə əsaslanan ənənəvi identifikasiya sistemlərindən fərqli olaraq yeni tətbiq optik süni intellekt alqoritmlərinə əsaslanır. Lakin süni intellekt əsaslı FeaturePrint məhsulun saxta olmasını tam dəqiq müəyyən etməsə də, qeydiyyatdan keçmiş məhsulların həqiqiliyini yoxlamaq üçün etibarlı mənbə hesab olunur. Hələlik FeaturePrint smartfonların tətbiq mağazalarında təqdim edilməsə də, artıq bəzi şirkətlər tərəfindən istifadə olunur.
