Apple şirkəti ötən illərdə təklif etdiyi kəpənək klaviatura dizaynlı modellərinə görə 50 milyon dollar təzminat ödəyəcək. Qeyd edək ki, təxminən 10 il əvvəl istehsal edilən MacBook modellərindəki kəpənək klaviatura dizaynına görə texnologiya nəhəngi məhkəməyə verilmişdi. 2015-2019-cu illər arasında satılan MacBook modelləri üçün texnologiya nəhəngi 50 milyon dollar təzminat ödəməyi təklif etmişdi. Bu gün isə məhkəmə texnologiya nəhənginin təklifini qəbul edib. Beləliklə Apple şirkəti ABŞ vətəndaşı olan 86 min MacBook istifadəçisi üçün təzminat ödəyəcək.
Xatırladaq ki, 2015-2019-cu illər arasında istehsal olunan MacBook, MacBook Pro modellərində Apple kəpənək klaviatura dizaynına keçid etmişdi. Belə ki, yeni dizayn nazikliyinə görə çox bəyənilsə də zaman keçdikcə problemlərə səbəb olurdu. Hətta problemlər demək olar bütün MacBook istifadəçilərində yaranırdı. Ötən il isə MacBook istifadəçiləri bu problemə görə Apple şirkətini məhkəməyə verib. Apple öz səhvini başa düşüb və kəpənək klaviatura dizaynına malik olan bütün MacBook sahiblərinə təzminat ödəməyi təklif edib. Məhkəmə bu təklifi 1 il sonra qəbul etdiyini bildirib.
Ümumiyyətlə Apple noutbuklarını daha incə etmək üçün öz keyfiyyətini qurban vermişdi. Belə ki, noutbuklar həqiqətən də çox nazik dizayna sahib olsa da, klaviaturalar qısa müddət sonra sıradan çıxırdı. Hətta klaviaturalar o qədər incə idi ki, arasına toz dolduqda öz-özünə basılırdı. Bundan əlavə klaviaturalar basılı qalırdı və ya qırılırdı. Xoşbəxtlikdən Apple şirkəti 2019-cu ildən bu dizayndan imtina etmişdi. Lakin Apple klaviatura xətasına görə 50 milyon dollar ödəməyə məcbur qalıb.
