Gələcəyin yeni texnologiyalara əsaslanan həbsxanası təqdim edilib. Cinayətkarlar strukturlaşdırılmış yaddaş implantları ilə təchiz oluna bilər. Cognify adlanan konsept həbsxana saxta xatirələrə malik cinayətkarların reabilitasiyasına yönəlib.
Bu yaxınlarda gələcəyin həbsxanasının necə olacağını göstərən qısametrajlı film paylaşılıb. Cognify adlı həbsxana müəssisəsi cinayətkarları virtual olaraq həbs etməyi təklif edir. Bu konsept həbsxana sistemində cinayətkarlar Matrix tipli kapsullara göndərilir və strukturlaşdırılmış yaddaş inyeksiyası vasitəsilə reabilitasiya edilir. Ən sadə formada Cognify məhbusların beyninə süni xatirələr yerləşdirməyi və beləliklə də onları reabilitasiya etməyi təklif edir. Məsələn, bir şəxs zorakılıq edərək cinayət işləyibsə, cinayətini qurbanın gözündən izləməyə məcbur edilir və ya narkotiklə əlaqəli cinayətləri, aludəçiliyi və sağalma mübarizəsini simulyasiya edən saxta xatirələrlə cəzalandırılır. Hormon müdaxiləsi real vaxt rejimində məhbusları empatiya, peşmançılıq kimi emosional vəziyyətlərə “alışdırmaq” üçün tətbiq ediləcək.
Paylaşılan videoda deyilir ki, cinayətkarlar ənənəvi həbsə alternativ olaraq Cognify-ı seçə bilərlər. Cognify-ın bəzi etik problemləri olsa da, müalicənin bir neçə dəqiqə ərzində baş verə biləcəyi ifadə edilir. Bütün bunlar hardansa tanış səslənə bilər. Elmi fantastika ilə maraqlanırsınızsa, oxşar həbsxana anlayışlarını görmüş və ya oxumuş ola bilərsiniz. Cognify-a bənzər bir həll A Clockwork Orange kitabında və ya A Clockwork Orange filmində təqdim edilib. Cognify həbsxana konsepsiyasının arxasında duran şəxs yəmənli molekulyar bioloq və elm kommunikatoru Hashem Al-Ghaili-dir.
