ABŞ-nin Clemson Universitetinin tələbələri BMW mühəndislərinin dəstəyi ilə gündəlik şəhər istifadəsində sərf etdiyindən daha çox elektrik enerjisi istehsal edə bilən eksperimental elektromobil hazırlayıblar. Deep Orange 17 layihəsi çərçivəsində yaradılan və Luminetta adlandırılan prototip enerjini avtomobilin gövdəsinə inteqrasiya edilmiş günəş elementlərindən əldə edir.
Layihə Clemson Universitetinin avtomobil mühəndisliyi üzrə təhsil alan 16 magistr tələbəsi ilə BMW-nin mühəndislərinin əməkdaşlığı nəticəsində ərsəyə gəlib. Təxminən iki il davam edən layihədə yüksək mühərrik gücündən daha çox enerji səmərəliliyinə, aşağı çəkiyə və gündəlik şəhər istifadəsinə üstünlük verilib.
Luminetta cəmi 550 kiloqram ağırlığındadır. Avtomobilin çəkisini minimuma endirmək üçün konstruksiyada polad və alüminiumla yanaşı, karbon lifindən və 3D printer vasitəsilə hazırlanan metal birləşdirici elementlərdən istifadə olunub.
Avtomobilin kuzovunun hazırlanmasında aerodinamik quruluşu ilə seçilən qutu balığının formasından ilham alınıb. Enerji sərfiyyatını daha da azaltmaq üçün regenerativ əyləc sistemi, ağıllı fırlanma anı paylanması və optimallaşdırılmış güc ötürmə idarəetməsi tətbiq edilib.
Avtomobilin üzərində 1700-dən çox günəş elementi var
Luminetta-nın əsas fərqləndirici xüsusiyyəti kuzova inteqrasiya edilmiş günəş panelləridir. Fraunhofer Günəş Enerjisi Sistemləri İnstitutu ilə əməkdaşlıq çərçivəsində hazırlanan sistemdə 1700-dən çox günəş elementi istifadə olunub.
Bu elementlər avtomobil həm hərəkətdə olarkən, həm də park vəziyyətində elektrik enerjisi istehsal edə bilir. Sistem şəhərdə binaların və ağacların yaratdığı qismən kölgələnmə şəraitində də enerji istehsalını davam etdirmək üçün hazırlanıb.
Beləliklə, avtomobil sahibi işə gəldikdən sonra avtomobili açıq havada saxladığı müddətdə batareya günəş enerjisi hesabına doldurula bilər.
Günəş enerjisi gündə əlavə 50 kilometr yürüş təmin edə bilər
Mühəndislər avtomobilin enerji balansını müəyyənləşdirmək üçün ABŞ-nin Greenville, Almaniyanın Frankfurt, İspaniyanın Madrid və Hindistanın Mumbai şəhərlərinin hava şəraiti və günəş bucaqlarını simulyasiya ediblər.
Sınaq ssenarisi gündə təxminən 20 kilometr avtomobil sürülməsini, qalan vaxtda isə avtomobilin açıq havada park edilməsini nəzərdə tutub. Nəticələrə əsasən, Luminetta sınaqdan keçirilən dörd şəhərin hamısında gündəlik səfər zamanı sərf etdiyi enerjidən daha çox enerji toplaya bilib.
Gün ərzində günəşdən əldə edilən enerjinin təxminən 50 kilometr əlavə yürüş üçün kifayət etdiyi bildirilir. Bu isə nəzərdə tutulan gündəlik səfər zamanı sərf olunan enerjidən təxminən 2,5 dəfə çoxdur.
Lakin bu göstərici avtomobilin istənilən şəraitdə enerji baxımından müsbət balans yaradacağı demək deyil. Nəticə konkret gündəlik yürüş məsafəsi, avtomobilin günəş altında nə qədər qalması, hava şəraiti və coğrafi mövqe kimi amillərdən asılıdır.
Deep Orange proqramının direktoru Greg Mocko da Luminetta-nın uzaq məsafəli ailə avtomobili kimi deyil, insanların əsasən qısa məsafələrə hərəkət etdiyi universitet şəhərcikləri və oxşar ərazilər üçün nəzərdə tutulduğunu bildirib.
Luminetta tədqiqat platformasına çevriləcək
Avtomobilin salonunda enerji istehsalı və sərfiyyatı haqqında məlumatları real vaxt rejimində göstərən xüsusi interfeys mövcuddur. Multimedia sistemi isə Apple CarPlay və Android Auto-nu dəstəkləyir.
Layihəni hazırlayan tələbələrin məzun olmasından sonra da Luminetta üzərində işlərin davam etdirilməsi nəzərdə tutulur. Avtomobil Clemson Universitetinin Beynəlxalq Avtomobil Tədqiqatları Mərkəzində tədqiqat platforması kimi istifadə ediləcək.
Deep Orange 17 layihəsinin əsas məqsədi belə avtomobili yaxın zamanda kütləvi istehsala buraxmaq deyil. Konsept günəş enerjisi, yüngül konstruksiya və yüksək enerji səmərəliliyinin gələcək elektromobillərdə necə birləşdirilə biləcəyini nümayiş etdirən eksperimental platformadır.
