Prosessor sahəsində ixtisaslaşan Intel şirkəti yeni Meteor Lake prosessorlarının süni intellekt mühərrikini təqdim edib. Son dövrlərdə texnologiyanın bütün sahələrində süni intellekt texnologiyasının istifadə edilməsi süni intellekt əsaslı prosessorlara və qrafik kartlara olan tələbatı əhəmiyyətli dərəcədə artırıb. Belə ki, Intel şirkəti də bu tələbatı qarşılamaq və prosessor bazarında liderliyini qorumaq üçün yeni süni intellekt mühərrikini təqdim edib. Intel şirkətindən əlavə Nvidia və Qualcomm kimi şirkətləri də artıq süni intellektin təkmilləşməsi nəticəsində bazar payını artırıb. Hətta bu şirkətlər öz dəyərlərini gün keçdikcə daha da artırır.
Ötən günlərdə baş tutan Computex 2023 tədbirində Intel şirkəti yeni Meteor Lake prosessorlarının süni intellekt mühhərriklərinə sahib olacağını elan edib. Qeyd edək ki, Intel şirkətinin yeni Meteor Lake prosessorları Forveros 3D texnologiyasına sahib ilk Intel prosessoru hesab olunur. Texnologiya nəhəngi bildirir ki, yeni prosessorlar yeni nəsil enerji idarəetmə sisteminə, yeni inteqrasiya edilmiş Intel Arc qrafik kartlarına sahib olacaq. Bundan əlavə yeni prosessorlar süni intellekt mühərrikinə sahib olacaq. Məhz bu səbəbdən də insayderlər gələcəkdə xarici qrafik kartlarına ehtiyac olmayacağını bildirir.
Bundan əlavə yeni Intel Metor Lake prosessorlarında i hərfi istifadə olunmayacaq. Belə ki, Intel ötən günlərdə yeni prosessor seriyasında Core Ultra adından istifadə edəcəyini bildirmişdi. Hətta bu barədə şirkətin mətbuat direktoru da öz Twitter hesabında gələcəkdə marka dəyişikliyinin ediləcəyini təsdiqləyib. Qeyd edək ki, Intel şirkəti Meteor Lake süni intellekt əsaslı prosessorlarını bu ilin üçüncü rübündə təqdim etməyi planlayır.
