Bu gün prosessor dedikdə ilk ağla gələn brendlərdən biri olan Intel yeni Meteor Lake seriyasında dəyişiklik edəcək. Belə ki, Intel şirkəti artıq Core i3, Core i5, Core i7 adlarından imtina edəcək. Yeni Meteor Lake seriyasında prosessorların adları dəyişdiriləcək. Qeyd edək ki, Intel Core i prosessorları artıq 15 ildir ki mövcuddur. Əvvəllər brend pentium seriyalı prosessorları təqdim edirdi. İndi isə brend məşhur Core i3, i5, i7 və i9 adlarından imtina edərək Core Ultra adlandıracaq.
Hətta Intel Core Ultra 5 1003h adlı yeni çipsetin sınaqdan keçirildiyi ortaya çıxıb. Məhz bundan sonra Intel şirkətinin mətbuat direktoru öz Twitter hesabında gələcəkdə marka dəyişikliyinin ediləcəyini təsdiqləyib. O bildirib ki, Intel Meteor Lake seriyası yeni eranın başlanğıcı olacaq və bu barədə yaxın günlərdə daha detallı açıqlama olacaq. Qeyd edək ki, Intel Ultra adını 2 səbəbdən seçə bilər. Birincisi, bildiyimiz kimi hazırda texnologiya sahəsində bir çox modelin, cihazın ultra versiyası var. Artıq Ultra sözü məşhurlaşıb. İkincisi isə M1 Ultra ilə rəqabət apara bilmək üçün.
Qeyd edək ki, bəzi mənbələr iddia edir ki, Intel 45 vattlıq H seriyalı prosessorlarını Core Ultra adlandırarsa, daha az performansa malik modellər üçün başqa adlardan istifadə edəcək. Buna misal olaraq Core Max, Core Pro göstərmək olar. Bundan əlavə isə yeni Intel Meteot Lake seriyasının daha performanslı olacağı gözlənilir. Bu ilin başlarında rekord səviyyədə vəsait itirən şirkət yenidən ayağa qalxmağa çalışır.
