Bildiyimiz kimi, 2011-ci il martın 11-də baş vermiş 9 bal gücündə zəlzələ Yaponiyanın şərq sahillərinə doğru irəliləyən sunami yaradaraq 20.000 adamın ölümünə, 120.000 binanın dağılmasına və Fukuşima elektrik stansiyasındakı üç reaktorda dağılmalara səbəb olmuşdur. Bu hadisədən sonra Yaponiya nüvə enerjisindən kəskin şəkildə imtina etməyə başlamışdı. Əslində, təkcə Yaponiya deyil, əksər böyük iqtisadiyyatlar da fəlakətdən sonra elektrik stansiyalarını bağlamağı planlaşdırırdılar. Lakin enerji və iqlim böhranı fonunda nüvə enerjisi yenidən yüksəlişdədir. Beləliklə, Yaponiya Fukuşima-dan 14 il sonra emissiya hədəflərinə çatmaq və enerji təhlükəsizliyini artırmaq üçün yenidən nüvə enerjisini gücləndirir.
Bu çərçivədə Yaponiya hökuməti təsdiqini gözləyən strateji enerji planı hazırlayıb. Bu plana əsasən, Yaponiya 2040-cı ilə qədər 30 nüvə reaktorunu tam şəkildə işə salmağı hədəfləyir. O vaxta qədər nüvə enerjisinin ölkənin ümumi enerji istehsalının təxminən 20 faizini təşkil edəcəyi gözlənilir. Fəlakətdən əvvəl ölkənin elektrik enerjisinin təxminən 30 faizini təmin edən 54 reaktor işləyirdi. Qeyd edək ki, yalnız 14 reaktor yenidən işə salınıb, digərləri isə istismardan çıxarılır və ya işə qayıtmaq üçün icazə gözləyir.
Yaponiya hökumətinin hazırladığı plana əsasən, nüvə enerjisindən istifadənin artırılması ilə yanaşı, kömürlə işləyən elektrik stansiyalarının göstəricisi 70 faizdən 30-40 faizə endiriləcək. Bəzi ekspertlər bildirir ki, Yaponiyanın atom elektrik stansiyaları o qədər köhnədir ki, onlara sərmayə qoymağın mənası yoxdur. Qlobal miqyasda ən azı 40 yaşı olan reaktorlar bütün aktiv reaktorların 40 faizini təşkil edir. Yaponiyada isə bu göstərici cəmi 20 faizdir, lakin ABŞ-da 94 reaktordan 64-ü (təxminən 68%) 40 ildən artıqdır ki, işləyir.
