Bəşəriyyət kainatda tək olub-olmadığını soruşmaq səyahətində yeni və həyəcan verici bir inkişafa imza atıb. Belə ki, NASA-nın Ceyms Uebb Kosmik Teleskopu (JWST) 124 işıq ili uzaqlıqdakı K2-18b adlı ekzoplanetdə həyatın ən güclü bioloji imzalarını müşahidə edib. Bu əlamətdar kəşf planetin öz ulduzunun qarşısından keçərkən atmosferi haqqında toplanmış məlumatlara əsaslanır. Ulduz işığı planetin atmosferindən süzülərkən JWST kükürd tərkibli qazların izlərini tutub. Bunlar arasında iki birləşmə xüsusilə fərqlənir: dimetil sulfid (DMS) və dimetil disulfid (DMDS).
DMS və DMDS Yerdə əsasən dəniz fitoplanktonları tərəfindən istehsal olunur. Beləliklə, bu birləşmələrin mövcudluğu potensial bioloji proseslərin nəticəsi ola bilər. Daha da təəccüblü odur ki, bu qazlar K2-18b atmosferində milyonda 10 hissə səviyyəsində aşkar edilmişdir – Yerdəki səviyyədən minlərlə dəfə yüksəkdir. Bu sıxlıq planetin səthində okean kimi şəraitdə yaşayan mikrob həyatın mövcudluğunu göstərə bilər. Kembric Universitetinin Astronomiya İnstitutundan professor Nikku Madhusudhanın rəhbərlik etdiyi komanda bu siqnalları əvvəllər də görmüşdü. Lakin bu dəfə müstəqil təsdiq James Webb-dən fərqli bir alətdən – Orta İnfraqırmızı Alətdən (MIRI) istifadə edilməklə təmin edilib. Tapıntılar artıq astrobiologiya dünyasında kifayət qədər səs-küyə səbəb olub.
2015-ci ildə kəşf edilən K2-18b adlı planetin kütləsi Yerdən 8,6 dəfə, diametri isə 2,6 dəfə böyükdür. Qalın hidrogen atmosferinə malik olması və qırmızı cırtdan L2-18-in yaşayış zonasında yerləşməsi bu planeti elm adamları üçün ideal tədqiqat sahəsinə çevirir. Bu xüsusiyyətlər K2-18b-ni “Hyceans” adlı planetlər sinfinə daxil edir: qalın hidrogen atmosferinə və səthlərində okeanlara sahib olmaq potensialına malik olan qırmızı cırtdan ulduzların ətrafında fırlanan dünyalar. Əldə edilən siqnallar, hazırda “üç siqma” səviyyəsindədir, yəni təsadüfi baş vermə ehtimalı yalnız 0,3% təşkil edir. Elmi ictimaiyyətdə “müəyyən bir kəşf” sayılmaq üçün bu nisbət beş siqmaya – və ya təxminən 0,00006%-ə düşməlidir. Digər tərəfdən, komandanın 18 ay əvvəl əldə etdiyi və o zaman böyük şübhə ilə qarşılanan məlumatlarla müqayisədə köklü irəliləyiş var.
