Bildiyimiz kimi, Google-un Android Auto və Apple-ın CarPlay, smartfonunuzun xüsusiyyətlərini avtomobilinizin idarə panelinə əks etdirməyə imkan verən ən yaxşı platformalar sırasındadır. Ancaq indi rəqabətə yeni oyunçu qoşulur: Samsung Auto. Bununla belə, Samsung Auto platforması hazırda Çin bazarı ilə məhdudlaşır və onun xaricdə satışa çıxarılması ehtimalı azdır.
Android Auto bütün dünyada milyonlarla sürücü üçün avtomobildaxili qoşulma həllinə çevrilsə də, Google xidmətlərinin məhdud olduğu Çin bazarında mövcud deyil. Bu boşluğu doldurmaq istəyən Samsung, One UI 7 versiyası ilə Samsung Auto adlı yeni avtomobildaxili təcrübəsini təqdim edib. Yeni platforma Android Auto ilə oxşar interfeys təklif edir. Naviqasiya, musiqiyə nəzarət, zəng və mesajlaşma kimi əsas funksiyalara avtomobilin ekranına inteqrasiya olunmuş xüsusi idarəetmə paneli vasitəsilə asanlıqla daxil olmaq mümkündür. Ancaq fərq yaradan bəzi xüsusiyyətləri ilə diqqət çəkir. Yeni Samsung platoformasının səsli əmr dəstəyi şirkətin rəqəmsal köməkçisi Bixby tərəfindən təmin edilir. Sistem həm simli, həm də simsiz olaraq avtomobillərə qoşula bilər. Bağlantı üçün Baidu CarLife+ və ICCOA CarLink kimi Çin əsaslı texnologiyalardan istifadə edilir.
Bu, platformanın tamamilə Çin istifadəçilərinin ehtiyaclarına uyğunlaşdırıldığını göstərir. İstifadəçilər həmçinin Samsung Auto proqramı vasitəsilə sistemin uyğun olduğu avtomobil modellərinin tam siyahısına daxil ola bilərlər. Məlumatlara görə, Çində satılan bir çox modellə uyğunluq var. Samsung Auto-nun diqqət çəkən xüsusiyyətlərindən biri onun məkana əsaslanan naviqasiya sistemidir. O, istifadəçinin mesajlarında ünvanları avtomatik aşkarlaya və bu yerlərə sürətli istiqamətlər verə bilər. O, həmçinin Çindəki bəzi yerli proqramlarla inteqrasiya edir və bir kliklə ünvanları paylaşaraq marşrutlar yaratmağa imkan verir. Bununla belə, o, Baidu və ICCOA standartlarına əsaslandığı üçün, Samsung Auto-nun qlobal bazarlara çıxması mümkün görünmür.
