Alimlər tərəfindən aşkar edilən yeni bir məlumata görə, kosmos insan ürəyini sadəcə qısa vaxt ərzində belə qocaldır. Tədqiqatçılar onun necə işlədiyini ölçmək üçün Beynəlxalq Kosmos Stansiyasına ürək toxuması göndəriblər.
ABŞ-da bir qrup alim tərəfindən aparılan araşdırmalar kosmosa uçuşun insan ürəyinə zərərli təsirlərini və qocalma aspektlərini ortaya qoyur. Tədqiqat çərçivəsində dizayn edilmiş ürək toxuması 30 gün ərzində sınaqdan keçirilməsi üçün Beynəlxalq Kosmik Stansiyaya (BKS) göndərilib. Qeyd edək ki, toxuma dəstlərindən ibarət dizayna sahib olan sistem çip-ürək adlanır. Tədqiqatçılar real vaxt rejimində stansiyada toxumaların büzülmə və döyünmə nümunələrini izləmək üçün sensorlardan istifadə ediblər. Habelə, müqayisə edə bilmək üçün eyni toxuma nümunəsi Yerdə də izlənilib.
Çip-ürək Beynəlxalq Kosmik Stansiyada 12 gün vaxt keçirdikdən sonra toxumaların büzülmə gücü demək olar ki, yarıya qədər azalıb. Bununla belə, Yerdəki toxumaların daralma və ya büzülmə gücü nisbətən sabit qalıb. Bu zəifləmə toxumada Yerə qayıtdıqdan 9 gün boyunca da özünü göstərib. Kosmosdakı toxumaların ritmlərinin zaman keçdikcə daha qeyri-müntəzəmləşdiyi və 19-cu gündə hər döyüntü arasındakı vaxtın 5 dəfədən çox artdığı araşdırmalarda da öz əksini tapıb. Lakin Yerə qayıtdıqdan sonra bu nizamsızlığın aradan qalxdığı qeyd edilib. Aparılan araşdırmalar nəticəsində kosmosda cəmi bir ay qalan insanların ürək toxumalarının zəiflədiyi, ürək döyüntüləri ritminin nizamsızlaşdığı, ürəyində yaşlanma təsirini təqlid edən molekulyar və genetik dəyişikliklərə məruz qaldığı bildirilib. Mikroqravitasiyanın kosmosda vaxt keçirən astronavtların bədənlərinə zərər verə biləcəyi, ürək-damar sistemində nizamsız ürək döyüntüləri kimi dəyişikliklərə səbəb olduğu da aşkar edilib. Tədqiqatçılar kosmosa uçuşun təsirlərini daha da araşdırmaq üçün digər ürək və orqan toxumalarını daha uzun müddətə kosmosa göndərməyi planlaşdırırlar. Beləliklə, aparılan digər araşdırmalardan sonra Alimlər kosmos insan ürəyini sürətlə qocaldır fikrini dəstəkləyə biləcəklər.
