Samsung Galaxy S25 Ultra modelinin Geekbench platformasında Snapdragon 8 Gen 4 çipseti ilə performansı ortaya çıxıb. Olduqca cəlbedici performans nəticəsi ilə smartfon çox nüvəli testdə Apple brendinin A18 Pro çipsetini üstələməyi bacarır.
Samsung-un yaxın aylarda təqdim edəcəyi flaqman smartfon Galaxy S25 Ultra, Snapdragon 8 Gen 4 çipseti ilə Geekbench platformasında görünüb. Maraqlısı budur ki, Qualcomm-un özü tərəfindən dizayn edilən performans nüvələrinə sahib olan Snapdragon Gen 4, sələfi ilə müqayisədə tək nüvəli performansda əhəmiyyətli inkişaf göstərir. Müvafiq olaraq, Galaxy S25 Ultra-da işləyən çipset, birnüvəli testdə 3069, çoxnüvəlidə isə 9080 xal toplayır. Müqayisə üçün qeyd edək ki, iPhone 16 Pro-nu gücləndirən Apple A18 Pro birnüvəli testində 3409 bal, çoxnüvəli testdə isə 8492 bal toplayıb. Snapdragon ilk testdə geridə qalsa da, çoxnüvəli testdə rəqibini qabaqlamağı bacarır.
Qeyd edək ki, sınaqdan keçirilən Galaxy S25 Ultra modeli 2 GB RAM və 2 + 6 nüvəli ardıcıllığa malikdir. İki performans nüvəsi 4,20 GHz, effektiv nüvələr isə 2,90 GHz-də işləyir. Qeyd etmək lazımdır ki, bu rəqəmlər test nümunələrinə aid olduğundan faktiki göstəricilər biraz daha fərqli ola bilər. Habelə, Galaxy S25 Ultra-nın gələn ilin əvvəlində təqdim ediləcəyi gözlənilir, ona görə də o vaxta qədər aparılan optimallaşdırmalar balları daha da yüksəldə bilər. Lakin hələlik, göstəricilər yeni flaqman smartfonun iPhone 16 Pro modelindən heç də geri qalmayacağını göstərir.
