Hollivudun ilk süni intellekt aktrisası kimi təqdim edilən Tilli Norvud (Tilly Norwood) növbəti dəfə gündəmə gəlib. Bir neçə aylıq fasilədən sonra müxtəlif proqramlarda müsahibələr verməyə başlayan virtual obraz britaniyalı aparıcı Pirs Morqanın (Piers Morgan) verilişində gözlənilməz hadisə ilə üzləşib.
Müsahibənin gedişində Norvud qəfil Çin dilində danışmağa başlayıb. Aparıcı bunun səbəbini soruşduqda virtual aktrisa kiçik xəta baş verdiyini qəbul edib, lakin hadisəni ciddi problem kimi təqdim etməyib.
Layihənin arxasında dayanan Particle 6 studiyası isə baş verənlərə fərqli izah verib. Şirkətin açıqlamasına görə, bir neçə dildə danışa bilən Norvud söhbət zamanı Çin dilində söz eşitdiyini zənn edib və buna görə həmin dilə keçib. Studiya hadisəni virtual obrazın çoxdilli imkanları ilə əlaqələndirib.
Particle 6 həmçinin müsahibədə istifadə olunan sistemin “Talking Tilly” adlı xüsusi versiya olduğunu bildirib. Bu versiya müsahibələr üçün hazırlanıb və şirkətin sözlərinə görə, aktyorluq məqsədilə istifadə edilən Tilli Norvud fərqli süni intellekt alətləri əsasında işləyir.
Tilli Norvud ilk dəfə təqdim ediləndə kino sənayesində süni intellektdən istifadə ilə bağlı müzakirələrə səbəb olmuşdu. Son müsahibədə yaşanan hadisə isə virtual obrazların canlı söhbətlər zamanı gözlənilməz cavablar verə bilməsini yenidən diqqət mərkəzinə gətirib. Particle 6 dil dəyişikliyini sistemin imkanları ilə izah etsə də, Norvudun özü bunu xəta adlandırıb.
