Ümumiyyətlə hərkəsə məlumdur ki, etdiyimiz bütün hərəkətlər müəyyən motivasiya qarşılığında müəyyən edilir. Belə ki, işə getmək pul mükafatından qaynaqlanır və ya evi təmizləmək yekunda təmizlik hissinin verəcəyi həzzdən qaynaqlanır. Gün ərzində etdiyimiz bir çox hərəkəti hansısa motivasiyamız olduğu üçün edirik. Daha doğrusu bizi həvəsləndirən mükafatın özü deyil, mükafatı alacağımızı bilmək hissidir.
Bununla belə eyni mükafat müxtəlif insanları müxtəlif yollarla motivasiya edir. Zəngin və kasıb ailələrdən olan uşaqların iştirak etdiyi araşdırma nəticəsində müəyyən edilib ki, onların sosial statusu beyindəki “motivasiya” mərkəzlərinin aktivləşməsinə güclü təsir göstərir. Bu isə o deməkdir ki, zəngin və kasıb ailələrin uşaqlarının beyinləri onların sosial statuslarından asılı olaraq fərqli işləyir. Məqalənin əvvəlində də qeyd etdiyimiz kimi, bizim bütün hərəkətlərimiz həzz almağa yönəlib. İnsan həzz almağı dayandırdıqda, məsələn, depressiyaya görə, laqeydləşir və həyatının mənasını itirir.
Biz çətin bir işi həll edə bildikdə və ya bir gündə böyük miqdarda işi görməyi bacardıqda müəyyən həzz alırıq. Bu həzz hissi isə beynin motivasiya mərkəzlərindən biri olan striatumun fəaliyyətindən qaynaqlanır. Məhz zəngin və kasıb ailələrdən olan uşaqların da fərqli düşünmələrinin əsas səbəkarı da bu striatumdur. Araşdırma nəticəsində ortaya çıxıb ki, kasıb ailələrdən olan gənclər qalib gəlməyə və uduzmağa daha biganə yanaşır. Habelə, işin sonunda əldə ediləcək gəlir və ya qazanc məbləği çox olduqda varlı ailələrdən olan gənclər cavab verməzdən əvvəl daha çox düşünürlər.
Tədqiqatçılar qeyd ediblər ki, sosial statusu aşağı olan ailələrdən olan yeniyetmələr qalib olub-olmamasından asılı olmayaraq cavab vermək üçün təxminən eyni vaxt tələb edir. Bu, mükafatın onlara fərqli təsir göstərdiyini, yəni striatumun daha az həssas olduğunu göstərir. Bütün bunların səbəbləri və nəticələri hələ də sirr olaraq qalır. Bununla belə, bu araşdırma beyin funksiyasının xüsusiyyətləri ilə insanın maddi vəziyyəti arasında əlaqəni göstərən ilk tədqiqat deyil.
