Bildiyimiz kimi, dünyada son dövrlərdə təbii fəlakət təhlükələrinin sayı artır. Məhz bu təbii fəlakətləri simulyasiya etmək üçün Avropa Kosmik Agentliyinin (EAA) dəstəyi ilə alimlər Yerin rəqəmsal əkizini yaradıblar. Bu, əslində təbii fəlakətlərin simulyasiyası üçün yenilikçi bir modeli təmsil edir. Qeyd edək ki, bu layihə, iqlim dəyişikli ilə bağlı real risklərin daha yaxşı başa düşülməsini və qarşını almağı mümkün edəcək.
Ümumiyyətlə, dünya, səthinin 71%-ni əhatə edən su olmadan yaşaya bilməz. Okeanlar bu rəqəmin təxminən 97%-ni əhatə edir. Təbiətdəki su dövranı, insanın da təsir etdiyi dəyişkən iqlim səbəbi ilə son dərəcə mürəkkəbdir. Bu səbəbdən daşqınlar, torpaq sürüşmələri və quraqlıq kimi təbii fəlakətlərin proqnozlaşdırılması planetin hər santimetrini əhatə edən, mümkün olduğu qədər yüksək ayırdetmə qabiliyyətinə malik məlumat modellərinin yaradılmasını və təhlilini tələb edir. Hətta bu modellərdə ən yüksək dağ zirvələrindən ən dərin dərinliklərə qədər bütün məlumatlar təhlil edilməlidir.
Yerin rəqəmsal əkizini yaratmaq layihəsi, alimlərə modelə yeni məlumat təqdim etmək və dünyanın müxtəlif mühitlərində təbii fəlakət ssenarilərini simulyasiya etmək üçün istifadə edilə bilən bir vasitə olacaq. Beləliklə, sürüşmə və digər fəlakətlər zamanı baş verə biləcək potensial dağıntını sanki həqiqətən baş verirmişcəsinə təhlil ediləcək. Bu isə gələcəkdə baş verəcək potensial dağıdıcı fəlakətlərə daha yaxşı hazırlaşmağa kömək edəcək. Belə bir modelin hazırlanması alimlərdən böyük zəhmət tələb edir. Çünki belə bir modeli yaratmaq üçün alimlər torpağın rütubətinin, yağıntının, qarın dərinliyinin, buxarlanmanın və çay axınının müntəzəm olaraq toplanan ölçülərini araşdırmalı və modelə daxil etməlidir. Qeyd edək ki, xüsusi modeldəki məlumatların doğruluğunu və etibarlılığını artırmaq üçün süni intellektin istifadə edilməsi də nəzərdə tutulur.
