Müasir dünyamızda ağıllı cihazların sayı dayanmadan artır. Belə ki, ötən günlərdə Stanford universitetinin alimləri ağıllı sarğı hazırlayıb. Bu sarğı, diabetik dəri yaraları kimi xroniki yaraların sağalma prosesini sürətləndirir. Sarğını ağıllı edən isə lazım olduqda elektrik cərəyanını stimullaşdırması xüsusiyyətidir. Qeyd edək ki, xroniki yaralar lazımi müalicələr edilmədikdə amputasiya hətta ölüm ilə nəticələnə bilir. Yeni cihaz hələki sınaq mərhələsindədir, əgər uğurlu alınarsa tibb sahəsinə yeni müalicə üsulu kimi əlavə edilə bilər.
Xroniki yaraların sağalmasını sürətləndirən ağıllı sarğı hansı xüsusiyyətlərə malikdir?
Stanford universitetinin alimləri tərəfindən hazırlanmış ağıllı sarğı 2 təbəqədən ibarətdir. Üst təbəqədə, elektron komponentlərin quraşdırıldığı 100 mikron qalınlığında olan polimer film var. Polimer filmin aşağısında isə, xroniki yara ilə təmasda olan “dəriyə bənzər” hidrogel yerləşir. Qeyd edək ki, ağıllı sarğıya quraşdırılmış biosensorlar davamlı olaraq xroniki yaranın elektrik müqavimətini və temperaturunu nəzarətdə saxlayır. Alimlər yeni sarğını sınaqdan keçirərkən yara sağaldıqca impedansın, iltihab azaldıqca isə temperaturun azaldığını müşahidə edib. Ümumiyyətlə ağıllı sarğının iş prinsipi toxumalara elektrik cərəyanı verilərək müalicə edilməsindən ibarətdir. Belə ki, alimlər bildirir ki, elektrik cərəyanları nəticəsində yaranın miqyası və yarada olan bakteriyalar tədricən azalır. Nəticədə isə, xroniki yarada olan infeksiya dərəcəsi 0-a enir.
Əlavə olaraq isə alimlərin hazırladığı ağıllı sarğı, telefon proqramı ilə əlaqə qura bilir. Yəni istifadəçi istədiyi vaxt sarğını çıxarmadan yaranın vəziyyəti barədə məlumat əldə edə bilər. Sarğının dəyişdirilməsi zamanı isə onu 40ºC-dək qızdırmaq lazım gəlir. Bundan sonra isə hidrogel yenisi ilə əvəzlənə bilər. Sarğı hələki insan üzərində sınaqdan keçirilməyib. Layihənin ilk müəlliflərindən olan Dr.Artem Trotsyuk bildirib ki, yeni sarğı gələcəkdə tibbə tamamilə yeni müalicə üsulu olaraq daxil olacaq.
