Hazırda ən çox istifadə olunan oyun konsollarından biri olan PlayStation 5 heç də Sony üçün yaxşı nəticə verməyib. Belə ki, PlayStation 5 satışları yeni Playstation 6 modelinin inkişaf xərclərini ödəmir və Sony çıxılmaz vəziyyətdədir. Ümumiyyətlə Sony yeni flaqman oyun konsolunu satışa çıxardıqdan bəri dünya üzrə 50 milyondan çox satışa nail ola bilib. Bununla belə satış rəqəmləri əvvəlki PlayStation 4 modelindən geridədir. Xatırladaq ki, Sony ötən aylarda yeni PlayStation 5 Slim modelini də satışa çıxarmışdı və bununla satış rəqəmlərinin artacağını ümid edirdi.
Analitiklərə görə PlayStation 5 satışları heç cür PlayStation 4 satışlarını illər ərzində keçə bilməyəcək. Bununla da PlayStation 6 modelinin inkişafı gecikə bilər. Qeyd edək ki, Toyo Securities investisiya şirkəti tərəfindən təşkil edilən seminarda məhz Sony şirkətinin 2024-cü il üçün gözləntiləri müzakirə edilib. Yapon şirkətinin bu il daha 18.5 milyon PlayStation 5 konsolu satacağı təxmin edilir. Lakin daha əvvəl Sony tərəfindən açıqlanan biznes planda bu rəqəm 25 milyon idi.
Sony şirkətinin flaqman PlayStation 5 konsolu PlayStation 6 xərclərini ödəmir. Yeni nəsil konsolun inkişaf etdirilməsi üçün lazım olan xərcləri qarşılaması üçün PlayStation 5 seriyası ən az 100 milyon ədəd satılmalıdır. PlayStation 6 ilə bağlı hələ çox detal məlum olmasa da, Sony şirkətinin yeni PlayStation 5 Pro üçün hazırlıqlara başladığı artıq məlumdur. Bu il sony yeni PlayStation 5 imzalı konsolunu təqdim etməklə planlanan satış rəqəminə çatmağa çalışacaq.
