Qlobal istiləşmənin qarşısını almaq üçün alimlər, ciddi müzakirələrə səbəb olan yeni layihə ortaya atıblar. Belə ki, xüsusilə qütblərdə buzlaqların əriməsini qarşısını almaq üçün nəzərdə tutulan bu proses atmosferə xüsusi aerozol parçaları püskürtməyə əsaslanır. Mikroskopik ölçüdə kükürd dioksid hissəciklərindən istifadə etməyi təklif edən alimlər süni bulud yaradaraq günəş işıqlarının birbaşa qütblərə çatmasının qarşısını bu üsulla almağın məntiqli olduğunu bildirirlər. Stratosferə aerozol injeksiyası adlandırılan bu metodun qlobal istiləşməyə indiyə qədər hazırlanmış ən ucuz həll yolu olduğu deyilir. Prosesin ildə təqribi 11 milyard dollara başa gəlməsi nəzərdə tutulub ki, digər iqlim problemləri həll yolarından təqribi 3 dəfə daha ucuz qiymətə başa gələcək.
Günəş işığını geri əks etdirmək və buzlaqların əriməsinin qarşısını almaq üçün hesablamalara görə ildə 175.000 uçuşa ehtiyac olacaq. 60 dərəcə şimal və cənub enliklərində atmosferə aerozol püskürdəcək təyyarələrin isə 13 km yüksəklikdə uçuş həyata keçirmələri planlaşdırılıb. Bu üsulla qütblərə doğru ildə temperaturun 2°C dərəcəyə qədər aşağı salına biləcəyi bildirilir.
Qütblərdəki bu proses planetin yalnız kiçik bir hissəsinin soyudulmasında işə yarayacaqdır. Atmosferə hər yerdə aerozol püskürtmək məntiqli olmadığından orta enliklərin temperaturunda ciddi bir dəyişiklik olmamalıdır. Alimlərin təklif etdiyi bu üsul insanlar tərəfindən hələ ki, birmənalı qarşılanmır. Qütblərdə çoxlu uçuş həyata keçirmək zərərli olan istixana qazlarının atmosferin yuxarı təbəqələrinə yayılmasına səbəb olacağı deyilir.
Layihənin baş tədqiqatçıları və alimlər atmosferə aerozol püskürtməyin ən məntiqli yol olduğunu və düşündüyümüzün əksinə insanlar üçün daha yararlı olacağı fikrindədirlər. Hal-hazırda kritik ehtiyac olacağı təqdirdə bu metodun tətbiq edilməsinin təhlükəsizliyi araşdırılır. Yaxın gələcəkdə isə belə bir prosesin həyata həyata keçirilib-keçirilməyəcəyi ilə bağlı dəqiq bir məlumat mövcud deyil.
