Marsa göndərilmiş məşhur Perseverance kosmik aparatının möhtəşəm işləri davam edir. Belə ki, NASA tərəfindən Mars planetinin indiyə qədər çəkilmiş ən böyük həcmə və detala malik şəkli rəsmi olaraq paylaşılıb. 2020-ci ildə çəkilmiş 1.8 gigapiksellik görüntüdən fərqli olaraq, Marsın 2.5 gigapiksellik yeni görüntüsü mars torpağı, qayalar, daşlar, səma və bir çox möhtəşəm xırda detalı özündə birləşdirib. Çəkilmiş şəklin həcmi isə nə az, nə çox tam olaraq 3.85GB təşkil edir. Əgər şəkli yükləmək istəyirsinizsə NASA rəsmi veb-saytına keçid edə bilərsiniz. Əgər sürətli internetiniz və bu qədər yüksək datanı işləyəcəyinə güvəndiyiniz bir cihazınız varsa həmin görüntünü yükləyib tanış olmağınızı məsləhət görürük. Çox təəssüf ki, aşağıda həmin şəkli sizin üçün tam keyfiyyətdə yerləşdirə bilmirik. Əgər yerləşdirsəydik böyük bir ehtimalla hələ də bu xəbərin yüklənməsi üçün gözləməli olacaqdınız. Lakin görüntünün videolaşdırılmış halına müəyyən təəssürat üçün səhifənin sonundan nəzər sala bilərsiniz.
NASA mütəxəssisləri marsın qədim dövrlərində həyatın mövcud olub-olmadığını öyrənmək istəyir
Mastcam-Z kamerası ilə Marsın 2.5 gigapiksellik şəklini çəkən Perseverance kosmik aparatı, eyni zamanda bu kraterdən süxur nümunələrini də toplayıb. Görüntülərdə 10 metr hündürlükdə külək ilə eroziyaya uğrayan nəhəng qayalar görünür. NASA bu qayalarda qat-qat yaranmış süxurları araşdıraraq qədim dövrdən qalan mikroorqanizmlərinin qalıqlarını axtarmaq istəyir. Jezero Krateri adlanan bu yer mövcud ola biləcək ən xırda canlı və ya həyata dair bir izin tapıla biləcəyi ideal nöqtələrdən biri hesab edilir. Çünki ehtimallara görə 3.5 milyard il əvvəl marsda bu kraterdə Jezero adı verilmiş göl olub.
Şəkil 12-20 iyun arasında çəkilmiş 1118 fərqli görüntünün birləşdirilməsi hesabına ərsəyə gəlib. Həmin nəhəng görüntünün video formatına köçürülmüş halı ilə üstdəki videodan tanış ola bilərsiniz. Lakin detal səviyyəsi yenə də xeyli aşağı olacaq.
