Şifrələr rəqəmsal təhlükəsizliyimizin əsas təməli olduğundan məxfiliyini qorumağımız olduqca vacibdir. Lakin bəzən bu şifrələr o qədər zəif olur ki, məxfiliyin verdiyi mənadan söhbət belə gedə bilməz. Məhz bu cür zəif şifrələri araşdıran NordPass resursu istifadəçilərin 2022-ci il ərzində ən çox istifadə edilən şifrələrin siyahısını tərtib edib. Böyük bir ehtimalla bu şifrələrdən ilk onluqda olanlarını özünüz də hardasa istifadə etmisiniz və ya təxmin edə biləcəksiniz. Həmin şifrələrin siyahısı ilə tanış olmamışdan əvvəl qeyd etmək lazımdır ki, insanların bəziləri sevdikləri filmlərin, işlətdikləri tətbiqin adını da şifrə kimi təyin edib. Məsələn, 2.5 milyon dəfə “batman” sözü, 53.9 min dəfə “euphoria” sözü, tanınmış tətbiqlər arasında 36.3 min dəfə “tinder”, hətta “facebook” və “Instagram” kimi sözlər də şifrə kimi seçilib. Bu şifrələr təqribən 1-10 saniyə ərzində sındırılmağa uyğun olan şifrələrdirlər. Yaxşı bəs ümumilikdə ən çox işlədilən və 1 saniyədən belə qısa vaxt ərzində sındırılan şifrələr hansılardır?
- password (4.929.113 dəfə işlədilib)
- 123456 (1.532.537 dəfə işlədilib)
- 123456789 (413.056 dəfə işlədilib)
- guest (376.417 dəfə işlədilib)
- qwerty (309.679 dəfə işlədilib)
- 12345678 (284.946 dəfə işlədilib)
- 111111 (229.047 dəfə işlədilib)
- 12345 (188.602 dəfə işlədilib)
- col123456 (140.505 dəfə işlədilib)
- 123123 (127.762 dəfə işlədilib)
Siyahının NordPass tərəfindən qeydə alınan 30 ölkə arasındakı parollarının statistikasında ilk onluqda bu şifrələr yer alıb. Lakin statistikalara əks olunmayan və daxil edilməyən ölkələrdəki şifrələrlə birlikdə qeyd edilmiş şifrələrin hər birinin bəlkə də onlarla qat üzərində təkrarlandığını təxmin etmək elə də çətin deyil. Siyahıda 147852369 tipli rəqəm kombinasiyaları belə vardır ki, təsadüfi şəkildə yığılmış şifrələr belə 1 saniyənin altında heklənən və 10.000-dən çox qeydə alınmış zəif şifrələrin arasında özünü göstərib.
Mütəxəssislərin məsləhətinə görə isə təsadüfi rəqəm kombinasiyalarında qarışıq rəqəmlərin arasında simvollar və ya hərflər əlavə etmək, eyni zamanda şifrəni biraz uzatmaq lazımdır. Lakin təhlükəsizlik üçün ən effektiv metod iki faktorlu təhlükəsizlikdən istifadə etməkdir. Eyni zamanda autentifikator tətbiqləri də parola sahib hesablarınızın təhlükəsizliyini artıra bilər.
