Smartfon sektorunda öz fəaliyyətini hər gün daha da genişləndirən Xiaomi şirkəti elektromobil sektoruna daxil olmağa hazırlaşır. Hətta buna görə şirkətin baş icraçı direktoru olan Lei Jun öz vəzifəsindən imtina edərək avtomobil sektoruna fokuslanacağını bildirmişdi. Şirkət 2024-cü ilin ilk yarısında yeni elektromobilini bazar çıxaracağını belə açıqlayıb. Xiaomi smartfon bazarında özünü Apple ilə müqayisə etdiyi kimi elektromobil bazarında da Tesla şirkətini hədəf almış kimi görünür. Belə ki, Çinli mənbələr Xiaomi firmasının avtopilotunu test edərkən çəkilmiş cəsus görüntüləri internetə sızdırıblar. Şəkillərdəki avtomobillərin Xiaomi firmasına aid olmadığı və test üçün hazırlandığı deyilir. Görüntü keyfiyyəti çox aşağı olan şəkillərdə sensorlar, yük yerindəki avtopilot kompüteri və.s diqqət çəkir.
Ehtimal edilir ki, Xiaomi öz avtopilotunu BYD firmasına aid test modelində sınayıb
Əgər model həqiqətən BYD firmasına məxsusdursa buna heç təəccüblənməmək lazımdır. Çünki, Çinin ən böyük elektromobil istehsalçısına çevrilən BYD bu ilin birinci yarısında Çində Tesla şirkətindən daha çox elektromobil satıb. Tesla şirkəti 564.000 elektromobil satarkən, BYD tərəfindən tam olaraq 641.000 elektromobil satılıb. Qarşılaşdırma əslində müəyyən qədər yanlışdır, çünki bura hidrogen ilə işləyən və.s modellər də daxildir. Lakin bunlar BYD-nin uğurunu kölgədə qoyacaq səbəblər deyil.
Xiaomi şirkəti hal-hazırda 1000-dən çox araşdırma və inkişaf proqramı ilə birlikdə işləyir. Üstəlik bununla bağlı 3,5 milyard yuan xərcləyib. Gələcək 10 il ərzində bu rəqəm 10 milyard yuana qədər çatmalıdır. Eyni zamanda şirkət 800-dən çox avtomobillə bağlı patentə sahibdir. Ona görə Çindəki texnologiya nəhəngi Xiaomi-nin də BYD ilə işləməyi bizim üçün sürpriz olmayacaq.
Test modelinin üstündə böyük bir Lidar sensoru yerləşdirilib. Avtonom idarə sisteminin ən lazımi detallarından biri olan Iidar texnologiyasının testi, yaxınlaşan elektromobildə şirkətin bu texnologiyadan yararlanacağını təsdiqləyir. Bu texnologiya ətrafın 3 ölçülü xəritələndirilməsində avtopilota önəmli müsbət təsirə malikdir.
Avtomobilin baqaj bölməsində isə böyük bir avtopilot kompüter yerləşdirilib. Təbii ki, test üçün olan bu kompüter sistemi təxmin etdiyiniz kimi seriya istehsalına uyğun modeldə olmayacaq.
Tam anlaşılmasa da yanlarda və kapotun üzərində müxtəlif sensorlarla testlər aparan Xiaomi, avtopilotunu tam avtonom idarəetməyə əminliklə hazırlayır. Əsas məsələ isə avtonom idarəetmə sisteminin real şəraitdə nə dərəcədə yaxşı işləyəcəyidir. Hələ ki, Tesla şirkətinə rəqib olaraq hazırlanmış eyni effektivliyə malik avtopilot yoxdur. Çünki, Tesla modellərinin avtopilotu getdiyi yolu real zamanlı analiz edərək hərəkət edir. Verilənlər bazasına mütləq ehtiyac duymur. Xiaomi-nin avtopilotu barədə qeyd edə biləcəklərimiz heyif ki, bu qədərdir. Fikirlərinizi rəylərdə bizimlə bölüşə bilərsiniz!
