Məlum məsələdir ki, Hyundai şirkəti ənənəvi avtomobil istehsalçıları arasında elektromobil bazarına ən çox diqqət ayıran markadır. Hətta ən çox diqqət ayıran yox, lider markadır belə desək yanılmarıq. Çünki, şirkət IONIQ brendi ilə elektromobil dünyasında özünə yeni bir cığır formalaşdırıb. Ötən həftə ikonik görünüşə malik IONIQ 5 modelinin də ölkəmizdə satışa çıxarılması şirkətin müxtəlif bazarlarda elektrikli avtomobil istehsalçısı kimi təmsil olunmasında çox yaxşı nümunələrdən biri oldu. Belə ki, elektromobil dedikdə ağılda ilk texnologiya ilə avtomobilin birləşməsi canlanır. Avtomobillərdə isə gələcəyin ən vacib texnologiyası avtopilot sistemləridir. Avtopilot texnologiyaları cəhətdən Tesla şirkətinin fərqli bir sinifdə olduğunu çoxları bilir. Bir neçə gün əvvəl “Tesla şirkətinin avtopilot sistemi nəyə görə hamıdan üstündür?” başlığı altında detalları izah etmişdik. Göründüyü qədərilə Hyundai brendi də uğuruna görə Teslanın yolunu izləmək qərarı alıb ki, avtopilot texnologiyaları cəhətdən bənzər strategiya tətbiq etməyi planlaşdırır.
“Hyundai Motor” lidar texnologiyası olmayan avtopilot sistemi inkişaf etməyə fokuslanır
LİDAR texnologiyası adətən avtomobillərdə ətrafını 3D formada skan etmək üçün istifadə edilir. Smartfonlarda bu texnologiyanı daha çox 3D modellər yaratmaq üçün iPhone modellərində görürük. Avtomobillərdə isə bu texnologiya birbaşa olaraq məsafənin dəqiqliklə təyin edilməsində işlədilir. Yəni ən sadə formada LiDAR sensorundan çıxan lazer və ya elektromaqnit dalğaları ətrafdakı cismə toxunub geri qayıtdığı müddətə əsasən obyektdən avtomobilə qədər olan məsafə təyin edilir.
Lakin bu texnologiyanın quraşdırılması xeyli baha və mürəkkəb olur. Əvvəlki illərlə müqayisədə hal-hazırda LiDAR texnologiyaları xeyli ucuzlaşıb. Buna baxmayaraq yenə də aşağı büdcəli modellərdə LiDAR quraşdırılması qiymətə xeyli mənfi təsir edir. Ona görə də avtopilot texnologiyalarını ucuz avtomobillərə gətirmək üçün daha fərqli alternativlər lazımdır. Tesla şirkəti illər əvvəl avtomobilləri üçün avtopilot sistemində LiDAR sensorundan bilinənə görə baha olması səbəbilə uzaq durdu. LiDAR əvəzinə 12 ədəd yüksək keyfiyyətli kamera ilə süni intellekt əsaslı proqram təminatına bir növ dərinlik anlayışı qazandırıldı. Hyundai da avtopilot texnologiyaları cəhətdən bənzər bir yol izləməyi planlaşdırır.
Belə ki, Hyundai Motor 20,4%-lik hissəsinə sahib olduğu LiDAR texnologiyasız, əsasən kameralarla işləyən avtopilot sistemi hazırlayan 42dot şirkətini tamamilə almağı planlaşdırır. Hal-hazırda 42dot şirkətinə 306.4 milyon dollar yatırım etməli olan Koreyanın nəhəng avtomobil istehsalçısı, 2030-cu ilin sonuna qədər elektromobil və avtonom İdarəetmə texnologiyalarına 79 milyard dollar büdcə ayırıb.
Beləliklə, Hyundai şirkətinin hədəfi eynən Tesla ilə bənzər prinsiplə daha münasib qiymətə, daha təkmili avtopilot sistemləri hazırlamaqdır. Şirkətin bu yolda nə qədər uğurlu olacağını gələcək illərdə görəcəyik.
