Uvodo startapı ilə bağlı 3 ay əvvəl paylaşdığımız “Yerli startap Uvodo 300.000 dollar investisiya alıb!” başlıqlı xəbəri bəlkə də xatırlayırsınız. Həmin xəbərimizdə də bəhs etdiyimiz kimi yerli Uvodo startapı 2022-ci ildə xarici bir şirkət tərəfindən alınmış Azərbaycanın ilk yerli startapı olan Nextsale təsisçiləri tərəfindən yaradılmışdır. Yerli startap ekosisteminin zirvələrinə adını yazdıran Nextsale startapından sonra indi də diqqətlər həmyerlilərimizin Uvodo startapına yönəlib.
Orxan Hacıyev, Taleh Kərimli və Vüsal Orucov tərəfindən təsis edilən 500.000 manat dəyərində investisiya cəlb etmiş “INNOLAND” rezidenti Uvodo ilə apardığımız müsahibəni bu məqaləmizdə sizlərlə bölüşürük.
Aşağıdakı suallar “Uvodo” həmtəsisçisi Taleh Kərimli tərəfindən cavablandırılıb:
– “Uvodo” startapı hansı işi görür? Qısa olaraq startapınızı necə təsvir edə bilərsiniz?
Uvodo, rəqəmsal agentliklər və e-ticarət mühəndisləri üçün nəzərdə tutulan, onların iş prosesini və proqramlaşdırma sürətini artıran e-ticarət mühərrikidir. Uvodo-nun digər elektron ticarət platformalarından fərqi onun əsasən rəqəmsal agentliklər və e-ticarət mühəndisləri üçün nəzərdə tutulması və lisenziya ilə satılmasıdır deyə bilərik. Uvodo-nun tərtibatı öz-sahiblənən (self-hosted) və başsız (headless) arxitekturaya əsaslanıb.
– Startapınızın əsas məqsədi nədir?
Məqsədimiz hər onlayn biznes sahibinin fərdi istəklərinə uyğun ticarət platformasına sahib olmasını asanlaşdırmaqdır. Müxtəlif e-ticarət həllərinin hazırlanması vaxt və pul itkisinə səbəb olur və pərakəndə satışın e-ticarətə keçidini çətinləşdirir. Bizim əsas məqsədimiz rəqəmsal agentliklər və fərdi işləyən e-ticarət proqram mühəndisləri üçün öz sinfinin ən yaxşı bünövrə rolunu oynayan e-ticarət platformasını yaratmaqdır.
– Növbəti 3 ildə startapınızla bağlı planlarınız nələrdir?
Məqsədimiz Uvodo-nu beynəlxalq səviyyədə tanınan elektron ticarət platforması etməkdir. Bundan əlavə də, hal-hazırda Uvodo-nun quraşdırılması texniki bilik tələb etsə də, yaxın vaxtlarda bunu hər kəs üçün asanlaşdırmaq istəyirik.
– Digər startap təsisçilərinə hansı tövsiyyələriniz var?
Məhsulun ilkin mərhələlərində gəlir qazanmaqdan daha çox məhsulu inkişaf etməyə fokuslanmaq lazımdır. Və ən əsası da, müştərilərlə mütəmadi əlaqədə olmaq, onları eşitmək və istəklərini yerinə yetirməkdir. Uzun sözün qısası, günün sonunda sizin məhsulunuz müştəriləri xoşbəxt etməkdir.
– Sizi ilhamlandıran şəxs kimdir? (Elon Musk, Steve Jobs, və.s)
Spesifik bir şəxs yoxdur. 10 il sonra sahib olacağım və ya olması lazım olan bütün şəxsi xüsusiyyətlər və nailiyyətləri əldə etmiş mən deyə bilərəm.
