Windows 11-də mövcud olan Başlatma menyusu istifadəçilərin diqqətini çəkən maraqlı bir performans problemi ilə gündəmə gəlib. Belə ki, proqram təminatı tərtibatçısı Aleks Fazio sosial media platforması X-dakı paylaşımında bildirib ki, bu menyu hər dəfə açıldıqda kompüter prosessorunun yükünü əhəmiyyətli dərəcədə artırır. Başqa sözlə Windows-11-in başlatma menyusu prosessoru lüzumsuz olaraq gərginləşdirir.
Fazionun iddiasına görə, bu əməliyyat sistemi komponenti Microsoft-un səmərəsiz texnologiyaya üstünlük verməsi səbəbindən lazım olduğundan daha çox resurs sərf edir. Təqdim olunan məlumata görə, Windows 11-də Başlat menyusu React Native adlı çərçivədən istifadə etməklə hazırlanıb. Bu yanaşma inkişaf prosesini sürətləndirsə və asanlaşdırsa da, bəzi performans problemlərini özü ilə gətirə bilər. React Native çərçivəsi JavaScript və oxşar veb alətləri ilə yaradılmış interfeysləri Windows kimi platformalarda işləyə bilən yerli proqramlara çevirir. Beləliklə, ortaya çıxan proqram EXE faylı kimi sistemdə işlədilə bilər. Daha əvvəl də qeyd etdiyimiz kimi, bu üsul prosesi sürətləndirsə də, tətbiqin “çox qatlı” strukturu səbəbindən performans itkilərinə səbəb ola bilər.
Fazionun iddiasına görə, Başlat Menyu hər dəfə açılanda prosessorda 30%-dən 70%-ə qədər ani yüklənmə artımı ola bilər. Bu vəziyyət X-də digər istifadəçilər tərəfindən də təsdiqlənib. Xüsusilə tövsiyə olunan proqramlar panelindən istifadə edildikdə bunun daha tez-tez baş verdiyi və bu vəziyyətin demək olar ki, hər ikinci menyu açılışında müşahidə edildiyi bildirilir. Xatırladaq ki, “Microsoft” hələlik bu məsələ ilə bağlı rəsmi açıqlama verməyib. Beləliklə, təqdim edildiyi gündən bəri bir sıra problemləri ilə “məşhurlaşan” əməliyyat sistemi bu dəfə də yeni bir xətası ilə gündəmə gəlib.
