Nəhayət avqust ayına çatdığımızdan Galaxy S seriyasının növbəti modelləri barədə yeni məlumatlar sızdırılmağa başlayıb. Ötən ilin sentyabr-oktybar aylarında Galaxy S22 Ultra modelinin prototip maketləri və dizayn elementləri artıq ortaya çıxmağa başlamışdı. 2021-ci ilin sonlarına doğru isə smartfon barədə demək olar bütün texniki detallar ən xırda elementinə qədər məlum idi. Bu il də böyük bir ehtimalla irəliləyən həftələrdə bənzər şeylərlə qarşılaşacağıq. Belə ki, İceUniverse ləqəbli tanınmış insayder Galaxy S23 Ultra modelinin əsas kamerası ilə bağlı məlumat verib. Samsung şirkəti 2 ildən çoxdur Galaxy S və Note seriyasında istifadə etdiyi 108MP HM seriyası kamera sensorlardan yeni Galaxy S23 Ultra modelində imtina edəcək.
Galaxy S23 Ultra modelinin sıfırdan hazırlanan kamerası 200MP (208MP) olacaq
İndiyə qədər Samsung tərəfindən təqdim edilən 200MP HP1 və 200MP HP3 kamera sensorlarından heç biri Galaxy S23 Ultra modelinə quraşdırılmayacaq. Samsung şirkəti bu modeli üçün sıfırdan yeni 200MP təsvir ölçülü yeni kamera hazırlayır. İnsayderin verdiyi məlumata görə ISOCELL “HP2” 200MP adlı bu sensor həm HP1 sensorundan, həm HP3 sensorundan daha böyük və güclü olacaq. Uyğun olaraq görüntü keyfiyyəti və udulan işıq miqdarı xeyli artacaq.
Ola bilsin ki, bir müddət əvvəl alınmış “Hexa²piksel” ticarət nişanı bu sensora aiddir
Xatırlayırısınızsa Samsung şirkətinin aldığı Hexa²piksel ticarət nişanı üzərindən aparılan analizlərdən firmanın 400MP kamera üzərində işlədiyini bildirmişdik. Əslində bəlkə də yanılmışıq. Həmin ticarət nişanı bu sensor üçün də alınmış ola bilər. Belə olduğu halda sensorun 200MP yox, 208MP təsvir ölçüsünə malik olacağını bildirən mənbələr 6 pikselin birləşərək 34.6MP, 13 pikselin isə birləşərək 16MP görüntülər qeydə alacağını qeyd edirlər. Dəqiq olan bir şey var ki, Samsung şirkəti Galaxy S23 Ultra modelinin kamerasına ciddi əhəmiyyət verəcək. Əgər cihaz bütün ölkələrdə də Snapdragon 8 Gen 2 ilə satışa çıxarılarsa istər iPhone 14 Pro seriyası, istər digər Android cihazlar ilə maraqlı rəqabət görəcəyik.
