Son günlərin ən çox gündəmə gələn xəbərlərindən biri Moskvada keçirilən şahmat turniri zamanı yaşanmış hadisədir. Belə ki, şahmat robotu şəhərin ən yaxşı oyunçularından olan 7 yaşlı uşağın barmağını sındırıb. Balaca oğlan tövsiyə olunan vaxtdan tez hərəkət edib və bu robotu çaşdırıb. Daha sonra robot uşağın barmağını əzərək qırılmasına səbəb olub. Həmin videonu məqalənin sonundan izləyə bilərsiniz. Hadisə daha əvvəllər robotların səbəb olduğu qəzaları gündəmə gətirib. Bu xəbərimizdə günümüzə qədər baş vermiş robot qəzaları haqqnda danışacağıq.
Robot tərəfindən öldürülən ilk insan
Robot tərəfindən öldürülən ilk insan 1979-cu ilin yanvarında Robert Williams olub. ABŞ-ın Miçiqan ştatında fabrik işçisi olan 25 yaşlı Uilyams anbar rəflərindən əşyaları götürmək üçün nəzərdə tutulmuş sənaye robotunun qolunun başına dəyməsi nəticəsində həyatını itirib. Onun ailəsi robot istehsalçısı Litton Industries-i məhkəməyə verib və 10 milyon dollar təzminat alıb. Məhkəmə belə bir qəzanın baş verməməsi üçün lazımi təhlükəsizlik tədbirlərinin görülmədiyinə qərar verib. Bu da robot qəzaları hadisələrini əngəlləmək üçün lazım olan tədbirlərin mütləq şəkildə alınmasını sübut edir.
Cərrah robot xəstəni öldürüb
2015-ci ilin fevral ayında üç uşaq atası və təqaüdçü musiqi müəllimi Stiven Pettit ürəyindəki mitral qapaq xəstəliyi səbəbindən İngiltərədəki Freeman xəstəxanasında robot əməliyyatı keçirib. Bu, ölkədə robotların köməyi ilə həyata keçirilən ilk ürək qapağı əməliyyatı idi. Robot çox səs çıxardığı üçün baş cərrah Sukumaran Nair və köməkçi cərrah Thasee Pillay bir-birini eşitməkdə çətinlik çəkib. Nair iş yoldaşlarına qışqıraraq robotun tikişləri yanlış şəkildə tikdiyini bildirən zaman istənməyən hadisə baş verib. Robot xəstənin aortasını zədələyib və robotun görməsini təmin edən kamera da daxil olmaqla hər yer qana boyanıb. Nəticədə xəstə dünyasını dəyişib. Bu hadisə insanlara ən çox təsir edən robot qəzaları sırasında ola bilər. Nair indi Şotlandiyada işləyir və robot cərrahiyyə əməliyyatları həyata keçirmir.
Avtopilotun səbəb olduğu qəza
Avtonom idarə olunan nəqliyyat vasitələrinin səbəb olduğu ilk ölüm 2016-cı ilin mayında qeydə alınıb. Keçmiş Hərbi Dəniz Qüvvələrinin zabiti Florida şossesində Tesla-nı sürücüsüz rejimə keçirib. Nəqliyyat vasitəsi traktorla toqquşduqda Tesla avtomobili yüzlərlə metr kənara atılıb. Teslanın avtopilot sistemi traktorun ağ rəngini parlaq səmaya bənzətdiyi üçün onu aşkar edə bilməyib. Hadisəni araşdıran tədqiqatçılar, sürücünün əyləci basmağa cəhd etmədiyini bildirib. Elon Musk-ın təsisçisi və baş direktoru olduğu firma sərnişinin faciəli ölümünü təsdiqləsə də, avtomobillərinin digərlərindən daha təhlükəsiz olduğunu deyərək özünü müdafiə edib.
İşçini 10 yerdən bıçaqlayan maşın
Ən qorxulu robot qəzalarından biri 2018-ci ilin dekabrında 49 yaşlı Çinli Zhou adlı fabrik işçisinin başına gəlib. Fabrikdəki nəhəng robot istehsal vasitəsi qəflətən çöküb və maşındakı 10 uclu çubuq Zhou-nun bədəninə sancılıb. Çubuqlardan doqquzu işçinin sağ qoluna, biri isə sinəsinə keçib. Zhou möcüzəvi şəkildə sağ qalıb.
Bu hadisələr nə qədər üzücü olsa da dünyamızda robotların inkişafı prosesləri hər gün irəliləməyə davam edir. Əgər robotlarla bağlı mövzular sizə maraqlıdırsa aşağıdakı xəbərimizi oxuya bilərsiniz.
Şahmat oyununda robotun uşaq barmağını sındırması
