Koreya nəhəngi 2021-ci ildə ilk ISOCELL HP1 200MP sensorunu təqdim etdi. Ondan sonra ISOCELL HP3 adlı ikinci 200MP kamerasını da bu il müştərilərin qarşısına çıxardı. Lakin bu 2 kamera sensorundan heç biri hansısa smartfonda qarşımıza çıxarılmayıb. Belə ki, ilk 200MP kameraya sahib smartfonun bu yaxınlarda Motorola firması tərəfindən Moto X30 Pro modelində quraşdırılaraq bazara çıxarılması planlaşdırılır. İndi isə, Samsung şirkəti yeni 450MP kamera sensoru ilə bağlı Hexa²pixel ilə əlaqədar yeni ticarət nişanı alıb.
İddialara görə yeni sensor 450MP təsvir ölçüsünə malik olacaq!
Samsung şirkətinin sonuncu 200MP kamerasını Tetra²pixel texnologiyası ilə təmin etmişdi. Tetra ifadəsi həmin sensor üçün 16 pikselin birləşib 1 piksel kimi davranmasını xarakterizə edirdi. İndi isə şirkət Avropa və Cənubi Koreya bölgəsi üçün Hexa²pixel adı ticarət nişanı almaqla bağlı qeydiyyatdan keçib. İddialara görə Hexa²piksel ifadəsi 36 pikselin 1 piksel kimi davranmasını təmsil edəcək. Belə olduğu halda sensorun 450MP olacağı bildirilir. Hal-hazırda Samsung firması hazırlanmaqda olan kamera sensoru barədə heç bir ifadə verməyib. Lakin sensorun hazırlıq mərhələsində olduğu bu ticarət nişanı ilə rəsmi olaraq təsdiqlənir.
Bəs sensorun təsvir ölçüsünün doğru olduğundan necə əmin ola bilərik?
Tetra²pixel ifadəsi 16 pikselin birləşməsində, tetra (4) bu kamera sensoru üçün bir növ 4² ifadəsini verir. 16 piksel isə birləşdikdə 200MP yox, 12.5MP təsvir ölçülü görüntülər qeydə alır. 12.5MP rəqəmini yenidən 200MP rəqəminə gətirmək üçün, 12.5MP rəqəmini 4² həllinə vurmaq lazımdır. Yəni:
“12.5 × 4² = 200”
Hexa²piksel isə 36 pikselin 1 piksel kimi davranmasını təmsil etdiyindən, yunan dilindən gələn hexa (6) ifadəsi kamera sensoru üçün 6²-ni ifadə edir. Əgər burada piksellər birləşdikdə standart olaraq kameranın 12.5MP görüntülər qeydə aldığını nəzərə alsaq aşağıdakı kimi hesablama aparacağıq.
“12.5 × 6² = 450”
Beləliklə, sadəcə bir ticarət nişanının sızması bizə bu cür böyük təxminlər aparmağa imkan verir. Kamera sensoru 2023-cü ildə istifadəyə verilməsi gözlənilir. Dİgər bir tərəfdən Samsung firmasının Galaxy S23 Ultra modelində 200MP kamera yerinə birdəfəlik 450MP təsvir ölçülü sensorun quraşdırılması da mümkün ola bilər.
