Müxtəlif yerlərdə datalarınızın toplanması ilə bağlı yazılarla yəqin ki, qarşılaşmısınız. Datalarımız bir çox hallarda şəxsi məlumatlarımızın məxfiliyinin qorunması şərtinə uyğun olaraq birbaşa analiz edilmir və ya satılmır. Daha çox istifadəçinin ümumi maraqlarına uyğun atdığı addımlar qazanc gətirəcək data rolunu oynayır. Lakin sizinlə bağlı ağlınıza belə gəlməyəcək ən xırda məlumat, həmin məlumatı doğru strategiya ilə satan şəxs üçün unikal bir qazanc mənbəyinə çevrilə bilər. Belə ki, süni intellekt sistemlərində tibbi məqsədlər üçün insanların simasının çəkildiyi fotolar işlədildiyi ortaya çıxıb.
İnsanlara aid tibbi fotolar LAION süni intellekt sisteminin verilənlər bazasında görülüb
Bu qəribə fakt Lapine ləqəbi ilə tanınan süni intellekt dizaynerinin LAION-5B ilə əlaqədar verilənlər bazasında təsadüfən özünün 2013-cü ildə çəkilən görüntülərini tapması ilə ortaya çıxıb. Süni intellekt dizaynerinin dediyinə görə şəxsi fotoları 2013-cü ildə keçirdiyi ağız və çənə əməliyyatı zamanı çəkilib. Bunun üzərinə araşdırmalarını davam etdirən Lapine, “Have I Been Trained” resursu üzərindən tərsinə mühəndislik ilə özünə məxsus görüntüləri biraz da araşdırmağa qərar verib. Nəticədə həqiqətən də əməliyyatdan əvvəl və sonrakı görüntülərinin LAION-5B verilənlər bazasında işlədildiyini dəqiqləşdirib.
Lapine ləqəbli şəxsin dediyinə görə nəzərdə tutulan tibbi fotolar süni intellekt sistemində istifadə üçün yalnız cərrah tərəfindən satıla bilər. Lakin əməliyyatı keçirən cərrah 2018-ci ildə xərçəng xəstəliyi ucbatından həyatını itirdiyindən baş verənlərə görə cərrahdan cavab almaq mümkün olmayıb.
Araşdırmanı ictimailəşdirən ArsTechnica resursu tədqiqatları biraz da genişləndirib. Verilən məlumata görə LAION süni intellekt sisteminin verilənlər bazasında minlərlə xəstəyə aid oxşar şəkillər mövcuddur. Beləliklə, arxamızda buraxdığımız ən xırda məlumat belə həmin məlumatı doğru strategiya ilə satan şəxslər üçün unikal bir qazanc mənbəyinə çevrilib. Süni intellektin verilənlər bazasını gücləndirməkdə istifadə oluna biləcək hazır fotolar həm vaxt və effektivlik baxımından texnoloji şirkətlər, həm də potensial qazanc mənbəyi kimi həkim və klinikalar üçün potensial bir dəyər rolunu oynayır. Göründüyü qədərilə məxfilik problemləri hələ ağlımıza gəlməyən bir çox sektorda qarşımıza çıxmağa davam edəcək.
