Çinlilər texnologiya sahəsində smartfon sektorunu ələ aldığı kimi dayanmadan avtomobil sektoruna hücum edirlər. İstər elektrikli, istər ənənəvi daxili yanma mühərrikli avtomobillər olsun bazarda çox sayda Çin avtomobilini görə bilərsiniz. Lakin sırf elektromobil istehsal edən Çinli nəhənglər o qədər artıb ki, hal-hazırda qlobal bazardakı bir çox şirkət üçün potensial bir nümunə və rəqibə çevriliblər. XPeng şirkəti də həmin nəhənglərdən biri hesab edilir. Belə ki, keçirilən təqdimat tədbiri çərçivəsində XPeng G9 elektrikli krossoveri təqdim edilib.
XPeng şirkəti G9 elektromobilinin batareyasının 80% doldurulmasına sadəcə 15 dəqiqə vaxt lazım olacağını bildirir
Normalda avtomobillər barədə ilk olaraq eksteryer detallarından danışaraq başlayırıq. Lakin XPeng G9 elektromobilinin texniki imkanları ilə mövzuya başlamaq daha məntiqlidir. Adətən yeni nəsil smartfonlar kimi, bu elektromobilinin 10 faizdən 80 faizə qədər doldurulmasına sadəcə 15 dəqiqə vaxt lazım olduğu bildirilir. Belə ki, elektromobil 480 kVt sürət ilə şarj olmağı bacarır. Tesla Model S modelinin DC doldurma məntəqələrində maksimum 250 kVt ilə şarj ola bildiyini nəzərə alsaq fərqin nə qədər böyük olduğunu təsəvvür etmək çətin deyil. Lakin əsas məsələ 480 kVt ilə avtomobili doldura biləcək stansiya tapmaqdadır. Amerikada ən yüksək enerji doldurma stansiyaları 350 kVt dəstəkləyir. Yəni nəticə etibarilə XPeng şirkəti G9 elektromobilində sanki, “Biz sizə sürətli doldurula bilən elektromobil hazırlaya bilərik, lakin siz bu qədər sürətli doldura bilən stansiya tapa bilməyəcəksiniz” mesajı göndərir. Şirkət 480 kVt şarj stansiyalarını Çində istifadəyə verib. Elektromobilin Avropada da satılması planlaşdırıldığından XPeng şirkəti Avropa üçün də belə şarj stansiyalarını quraşdırmalı olacaq.
Elektromobil arxa və tam ötürməli elektrik mühərriklərinə sahib 3 variantda təklif olunur. Arxa ötürməli variantı standart və uzun mənzilli olmaqla 2 modifikasiyaya ayrılır. Tam ötürməli variantı isə yalnız 1 modifikasiyada təqdim edilir. Uyğun olaraq arxadan ötürməli variantı 570 km, arxadan ötürməli uzun mənzilli variantı 702 km, tam ötürməli variantı 650 km məsafə qət edir. Uzun mənzilli variantı 98 kVts, digər variantları isə 78,2 kVts batareya ilə təchiz edilib. Arxadan ötürməli variantı 313 at gücü, 430 nm fırlanma anı hasil edir. Tam ötürməli variantı isə 551 at gücünə və 717 nm fırlanma anına malikdir. Uyğun olaraq arxadan ötürməli variantı üçün 6.4 saniyə, tam ötürməli variantı üçün 3.9 saniyə 0-100 km/s sürətini toplamağa kifayət edir.
XPeng G9 modelinin XPILOT 4.0 avtopilot texnologiyası NVIDIA Drive orin çipi ilə gücləndirilib. 31 fərqli sensora və 2 ədəd LIDAR-a sahibdir. XPILOT 4.0 texnologiyası, Tesla Autopilot qədər mükəmməl qabiliyyət göstərməsə də xeyli yaxşı nəticələr verir.
Elektromobilin interyer və eksteryer detalları
Yeni XPeng G9 modeli BMW X5 modelindən biraz kiçikdir. Ön tərəfdə X Robot Face üslublu dizayn mükəmməl hissiyat yaratmağı bacarıb. Xüsusilə minimalizm və sadəlik fəlsəfəsini özündə birləşdirən bu üslub yanlara doğru da mükəmməl uzadılıb. Elektromobilə xüsusilə yandan baxdıqda gövdənin arxaya doğru sıxılmadağını görə bilərsiniz. Nəticədə elektromobil daxilində xüsusilə arxa tərəfdə yetəri qədər baş məsafəsinin əldə edildiyi bildirilir. Arxa tərəfin dizaynı barədə isə danışacaq çox bir şey yoxdur.
İnteryerdə cihazlar panelinə 2 ədəd 14.96 düymlük nəhəng ekranlar quraşdırılıb. 10.25 düymlük idarə paneli ilə müqayisədə olduqca nəhəng ekranlar Qualcomm 8155 platforması üzərinə X-mart 4.0 proqram təminatı ilə işləyir. Bu platformanın daxilindəki prosessor səhv etmiriksə, smartfonlardakı Snapdragon 8150 ilə əlaqədar olan Snapdragon 855 çipsetinin uyğunlaşdırılmış variantıdır. Nəticədə olduqca axıcı multimedia imkanları vəd edir. Xüsusilə interfeysdəki bir çox detallar Unity3D mühərriki ilə hazırlandığından interfeys çox gözəl görünür. 18 ədəd Dolby Atmos dəstəkli XPeng istehsalı səs sisteminə malikdir. Əlavə olaraq 220 voltluq elektrik yuvası da salon daxilində quraşdırılıb.
XPeng G9 elektromobilinin qiymətinə gəldikdə başlanğıc variantı 43.962 dollardan başlayır və texniki cəhətdən ən güclü xüsusiyyətləri özündə birləşdirən variantı 66.662 dollara təklif edilir. Qiymət cəhətdən ən əsas fərq isə üstdə sadaladığımız batareya paketi, arxa və ya tam ötürməli kimi modifikasiya dəyişikliklərindən yaranır. İstehsal ayda 10.000 ədədə çatdıqdan sonra elektromobilin Avropaya çıxarılması planlaşdırılır.
