DLSS 3.5 barədə danışmazdan əvvəl bu texnologiya barəsində qısa bir informasiya vermək məntiqli olacaq. Belə ki, performans və keyfiyyət arasında mükəmməl tarazlığı tapmaq problemi hər zaman mövcud olub, lakin son 5 ildə NVIDIA şirkətinin DLSS texnologiyası vacib bir həll kimi ortaya çıxdı. Sadə formada izah etsək, oyunlar oynadığınız zaman ekranda gördüyünüz şəkilləri yaratmaq üçün kompüteriniz, daha doğrusu qrafik kartınız çoxlu hesablamalar aparmalıdır.
DLSS isə, qrafik kartınızın görüntü yaratmaqda yüksək emal gücü sərf etmədən, görüntünü (kadrları) keyfiyyət itkisi olmadan vizual olaraq yüksək FPS dəyərlərində göstərməyə imkan verən texnologiyadır. Elə düşünün ki, görüntü keyfiyyəti artdıqca göstərilə bilən FPS (kadr sayı) emal gücünün yetərsizliyi səbəbi ilə azalırsa, NVIDIA şirkətinin hazırladığı DLSS bunun qarşısını alır.
Nvidia-ya görə, DLSS 3.5 əsasən şüa izləmə təcrübəsini təkmilləşdirməyə yönəlib. GPU nəhəngi DLSS 3.5 üçün Ray Reconstruction (RR) adlı yeni bir xüsusiyyət istifadəyə verib. Bu xüsusiyyəti oyun və oyun mühərriki məlumatlarını birləşdirərək, müxtəlif şüa izləmə effektlərini anlayıb, görülə bilən və görülə bilməyən məkan məlumatlarını ayırd etdikdən sonra təkrar emal üçün yüksək tezlikli məlumatları qorumaqda öyrədilmiş bir alqoritm kimi izah edə bilərik.
Şirkətin iddiasına görə Ray Reconstruction-ın DLSS3-dən beş dəfə çox məlumat setinə malikdir. Beləliklə, şüa izləmə və DLSS aktivləşdirildikdə, vizual çirklənmə böyük ölçüdə aradan qaldırılacaq. Bu məqamda qeyd etmək lazımdır ki, mövcud DLSS versiyaları hesablanmayan şüaları bərpa etmək üçün süni intellekt alqoritmlərindən dəstək alır. Lakin belə olduqda görüntülərin işlənməsində bəzən istənməyən itkilər yaşanır. Ray Reconstruction üçün isə bu problem yeni bir həll üsulu gətirir. Nvidia tərəfindən paylaşılan nümunə şəkillərdə də deyilənlərin həqiqətən olduğu rahatlıqla müşahidə edilir. Həm işığın canlılığında, həm də ümumi görüntü keyfiyyətində ciddi artım görülür. Onu da qeyd etmək lazımdır ki, FPS dəyərlərində də kiçik artım olacaq.
