Uzunmüddətdir ki, Microsoft şirkəti Activision Blizzard oyun şirkətini almağa çalışır. Lakin bu addım oyun sahəsində rəqabətə son qoyacağı üçün bir çox beynəlxalq qurum icazə vermirdi. İndi isə Microsoft, Activision Blizzard şirkətinin oyun hüquqlarını Ubisoft-a satmaq qarşılığında Böyük Britaniyadan icazə alacaq. Beləliklə Call of Duty daxil olmaqla bütün Activision oyunları Ubisoft+ xidməti ilə oyun həvəskarlarına təqdim ediləcək.
Microsoft şirkəti əvvəlcə Activision oyun hüquqlarını Xbox üçün almaq istəyirdi. Lakin daha sonra icazələri ala bilmədikdə fikrini dəyişməyə məcbur olub. Həm playstation, həm də xbox istifadəçiləri üçün əlçatan olan Ubisoft+ abunəlik xidməti bundan sonra bütün activision oyunlarına sahib olacaq. Məhz bu addım oyun bazarındakı rəqabəti pozmayacağı üçün Böyük Britaniya tənzimləyicisi CMA icazə verib. Maraqlısı budur ki, əgər Microsoft və Activision Blizzard bütün icazələri tamamlayaraq birləşərsə 15 il ərzində buraxılacaq bütün oyunlar Ubisoft+ bulud xidməti üzərində təqdim ediləcək. Həmçinin Microsoft prezidenti Bred Smith bu hüquqların daimi olacağını da vurğulayıb.
Daha əvvəl Activison oyunlarının Xbox Cloud Gaming üçün eksklüziv ediləcəyi iddia edilirdi. Məhz bu səbəbdən bir çox qurum bunun rəqabəti pozduğunu bildirmişdi. İndi isə bu oyunlar Ubisoft+ özəl ola bilər. Bu isə həm playstation, həm də xbox istifadəçiləri üçün əlçatandır. Əldə edilən razılaşmaya görə Ubisoft Activison Blizzard oyunlarının hüquqları qarşılığında Microsofta müəyyən vəsait ödəyəcək. Hazırda bu vəsait tam olaraq məlum deyil. Onu da qeyd edək ki, Ubisoft+ abunəliyi hazırda 17.99$ təşkil edir.
