Elon Musk və sənayenin aparıcı süni intellekt mütəxəssisləri açıq məktubda bildiriblər ki, OpenAI tərəfindən yenicə buraxılan GPT-4 süni intellekt modelindən daha güclü modellər ən azı 6 ay daha inkişaf etdirilməməlidir. Bill Gates isə müsahibəsində süni intellekt inkişafının dayandırılması fikri ilə razılaşmadığını və bunun işə yaramayacağını bildirib.
ChatGPT-nin dünya miqyasında təsiri və istifadəçilərin sayının sürətlə artması Tesla, SpaceX və Twitter-ın baş direktoru olan Elon Musk-ın da diqqətini çəkmişdi. Musk süni intellektdən narahat olduğunu dəfələrlə dilə gətirib. Keçən həftə Musk və Apple-ın qurucusu Steve Wozniak kimi sənayenin əhəmiyyətli şəxsiyyətləri, ChatGPT kimi süni intellekt vasitələrinin inkişafının dayandırılması lazım olduğunu açıqladılar.
Microsoft şirkətinin 10 milyard dollardan çox sərmayə qoyduğu OpenAI, işinə müəyyən müddətlik ara verib-verməyəcəyi ilə bağlı açıqlama verməsə də, Microsoft qurucusu Bill Gates, “Məncə, müəyyən bu sahədə kimdənsə fasilə verməsini istəmək problemi həll etməyəcək” deyə qeyd edib. Gates-in fikrincə, bu vasitələrin böyük faydaları var və edilməli olan, çətinlikləri müəyyən edib aradan qaldırmaqdır. Bundan əlavə, Gates yazdığı bloq yazısında ChatGPT-ni son 40 ilin ən böyük texnoloji inkişafı olaraq gördüyünü də bildirmişdi.
Bill Gates süni intellekt inkişafını dayandırmaq çağırışının praktiki olaraq çətin olacağını da ifadə edərək, “Mən həqiqətən kimin dayana biləcəyini anlamıram, dünyada hər ölkə dayanmağa razı olarmı və niyə dayanmalıdır?” ifadələrini davam etdirib. Açığı, Gates çox tutarlı bir fikir söyləyir. OpenAI işlərini dayandırsa belə, digər şirkətlər və ya ölkələr dayanacaqmı? Böyük bir ehtimalla bu sualın cavabı böyük bir “yox” olacaq.
